Հայաստանի՝ խաղաղության պայմանագրի չմշակված տեքստը ստորագրելու առաջարկն անընդունելի է․ Ալիևի ներկայացուցիչ

Հայաստանի՝ Խաղաղության պայմանագրի անավարտ տեքստը ստորագրելու համառ փորձերը ոչ այլ ինչ են, քան միջազգային հանրության աչքերին թոզ շպրտելու և նրա իրական մտադրությունները թաքցնելու փորձ։ Այս մասին Բեռլին TV-ին տված հարցազրույցում ասել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը։

Նրա խոսքով, Հայաստանն իբր Ադրբեջանին ներկայացնում է «անընդունելի առաջարկներ» և ձգձգում է բանակցությունները։

«Հայաստանը և նրա աջակիցները պետք է հասկանան, որ առանց Հայաստանի Սահմանադրությամբ ամրագրված տարածքային պահանջների խնդրի լուծման՝ անհնար է վերացնել հայ-ադրբեջանական հակամարտության բուն պատճառները և հասնել կայուն խաղաղության»,- ասել է Ադրբեջանի նախագահի հատուկ հանձնարարությունների գծով բանագնացը։ 

Ամիրբեկովը նաև հայտարարել է, որ Ադրբեջանը, իբր, հանդես է գալիս խաղաղության օգտին, և այժմ Երևանը պետք է նման քայլի գնա։

«Գնդակը Հայաստանի դաշտում է, և մենք հուսով ենք, որ նրանք բաց չեն թողնի պատմական հնարավորությունը՝ շրջելու մեր հարաբերությունների ողբերգական էջը»,- հայտարարել է Ամիրբեկովը։