«Պլաշչադկա» են տեղափոխվել օրինախախտ վարորդների թանկարժեք ավտոմեքենաները, այդ թվում՝ ՔՊ անդամների

Վերջին 1 ամսվա ընթացքում ՀՀ ներքին գործերի նախարար Վահե Ղազարյանի, ՀՀ ՆԳՆ ոստիկանության պետ, ՆԳ նախարարի տեղակալ, ոստիկանության գեներալ մայոր Արամ Հովհաննիսյանի հանձնարարականներով՝ ՀՀ ՆԳՆ ոստիկանության պարեկային ծառայության պետ, ոստիկանության պետի տեղակալ, ոստիկանության գնդապետ Արթուր Խուդինյանի գլխավորությամբ Երևան քաղաքի գնդի պարեկները՝ գնդի հրամանատար Անդրանիկ Իսախանյանի և գումարտակների հրամանատարների մասնակցությամբ Երևանում իրականացրել են անվտանգ երթևեկություն միջոցառում:

Shamshyan-ի հաղորդմամբ՝ Երևան քաղաքի գնդի պարեկները 1 ամսվա ընթացքում հայտնաբերել են 100-ից ավելի օրինախախտ վարորդների, որոնց մեծ մասը օրենսդիր և գործադիր, դատական համակարգերի աշխատակիցներ են եղել, անգամ՝ իշխող՝ «ՔՊ» կուսակցության անդամներ ու նրանց բարեկամներ:  

Աղբյուրը գրում է․ «Շատերը փորձել են պարեկներին համոզել, որ իրենք արտոնյալ են,որ պետք չէ իրենց նկատմամբ վարչական արձանագրություններ կազմվեն ու մեքենաներն էլ կարիք չկա տեղափոխել «պլաշչադկա», սակայն բոլորի նկատմամբ կազմվել են վարչական ակտեր՝ հիմնականում ավտոմեքենան վարել են առանց ամրակապվելու, վարելիս խոսել են հեռախոսով, վարելիս ծխել են, ավտոմեքենաների ապակիները եղել են սահմանված կարգից ավելի մգացված:


Հայտնաբերվել են նաև մեծ թվով վարորդներ, ովքեր եղել են ոչ սթափ»: