Սևան համայնքն ամփոփել է մարզական տարին

Գեղարքունիքի մարզի Սևան համայնքում մարզական տարին ամփոփվել է լուրջ ձեռքբերումներով։ 

Ինչպես տեղեկացրին Սևանի համայնքապետարանի աշխատակազմից, սևանցի մարզիկները 2024 թվականին մասնակցել են հանրապետական, համահայկական, միջազգային առաջնություններին և մրցաշարերին, իսկ նրանցից շատերը Սևան են բերել մեդալներ: 

Սևանի Ն. Դագարյանի անվան մարզադպրոցի ծանրամարտի խմբի սան Հովհաննես Հովհաննիսյանը Վանաձոր քաղաքում կայացած ծանրամարտի բաց առաջնությանը գրավեց 1-ին մրցանակային տեղը: Չի ուշացել նաև հաջորդ հաղթական մեդալը: 

Մարզիչ Գառնիկ Աբրահամյանի սանը Պերուի Լիմա քաղաքում կայացած աշխարհի ծանրամարտի պատանիների առաջնությանը նվաճել է փոխչեմպիոնի կոչում, որին հաջորդել է Հունաստանի Սալոնիկ քաղաքում կայացած Եվրոպայի պատանիների առաջնության ոսկե մեդալը: 

Ծանրամարտի մարզիչ Գառնիկ Աբրահամյանի համար ևս 2024 թվականը հաղթական էր. Լեհաստանի Պաբյանիցե քաղաքում կայացած WPA վարկածով պաուերլիֆտինգի աշխարհի գավաթի մրցումներից նա վերադարձել է՝ 1-ին մրցանակային տեղ գրաված:

Բռնցքամարտի մարզիչներ Հովիկ Վարդանյանի և Անդրանիկ Քամալյանի սաներ Կարինե Դալլաքյանը և Միքայել Պետրոսյանը Հայաստանի բռնցքամարտի պատանիների առաջնությունից տուն են վերադարձել ոսկե մեդալներով:

Վրաստանի մայրաքաղաքում կայացած բռնցքամարտի միջազգային առաջնությունը հաղթական էր Միքայել Պետրոսյանի, Ալեք Մանուկյանի, Նարեկ Կարոյանի, Դավիթ Բարսեղյանի համար, որոնք նվաճել են 1-ին մրցանակ:

Առաջնությունում 2-րդ մրցանակակիրներ են դարձել Էդգար Ամոևը և Հրանտ Դավթյանը:

Թաեքվոնդոյի մարզիչ Խաչիկ Թորոսյանի սանը՝ Դավիթ Թորոսյանը, շարունակել է իր հաղթական մրցելույթները նաև անցնող տարում:

Երևանում կայացած ՀՀ թաեքվոնդոյի մեծահասակների առաջնությունում Դավիթը դարձել է 1-ին մրցանակակիր և 7-ակի չեմպիոն, իսկ Եվրոպայի համալսարանական խաղերում (G-1) նվաճել բրոնզե մեդալ:

Մարզիչ Արման Գրիգորյանի սան Նարեկ Նավասարդյանը Երևանում կայացած երիտասարդների առաջնությանը դարձել է փոխչեմպիոն:

Մարզադպրոցի սան Ռազմիկ Շուշանյանի համար տարին մեդալառատ էր: Մարզիչ Էդգար Ղարիբյանի սանը Երևանում կայացած K-1 WAK-1F քիքբոքսինգի մրցաշարում դարձել է ոսկե մեդալակիր, Թաիլանդական բռնցքամարտի միջազգային IFMA Erevan open առաջնությունում, K-1 WAK-1F միջազգային առաջնությունում, K-1 միջազգային մրցաշարում, Հայաստանի K-1 WAK-1F բաց առաջնությունում ևս լավագույնն էր, իսկ արդյունքը ոսկե մեդալներն են:

Այս առաջնություններում քիքբոքսինգ մարզաձևի մարզիկներ Հովսեփ Ղարիբյանը, Լևոն Խաչատրյանը, Ալբերտ Գրիգորյանը, Վահե Խաչատրյանը ևս հանդես են եկել լավագույնս, մեր մարզիկների համար առաջնությունները եղել են մեդալառատ՝ ոսկե և արծաթ մեդալների տեսքով:

«Սևանի ջրային մարզաձևերի մանկապատանեկան մարզադպրոց» ՊՈԱԿ-ի մարզիկների համար ևս անցնող տարին նշանակալից էր և մեդալառատ: 

Արա Վիրաբյանը և Վահե Դավթյանը, Գևորգ Փիլոսյանը, Նորիկ Մարգարյանը ՀՀ մեծահասակների առաջնությանը թիավարություն, բայդարկա և կանոէ մարզաձևում գրավել են 1-ին մրցանակային տեղեր:

Վահե Դավթյանը, Արա Վիրաբյանը մասնակցել են աշխարհի մեծահասակների առաջնությանը, որը կայացել է Ուզբեկստանում:

Գևորգ Փիլոսյանը և Նորիկ Մարգարյանը Հունգարիայում մասնակցել են Եվրոպայի մեծահասակների առաջնությանը:

Արթուր Պետրոսյանը մասնակցել է թիավարություն պարականոէ մարզաձևի Եվրոպայի առաջնությանը: 

Առագաստանավային մարզաձևում ևս գրանցվել են հաջողություններ Նարե Սուքիասյանը 2024 թվականի ՀՀ առաջնությունում դարձել է 1-ին մրցանակակիր:

Նարեն 1-ին մրցանակակիր է դարձել նաև Ծովակալ Իսակովի անվան միջազգային մրցաշարում, իսկ Թբիլիսիում կայացած առաջնությունում գրավել է 3-րդ տեղը, մասնակցել է նաև Գելենջիկյան միջազգային մրցաշարին:

Գագիկ Սարգսյանը ՀՀ Մեծահասակների առաջնության 1-ին մրցանակակիր է, Գելենջիկյան միջազգային մրցաշարի մասնակից:

Ավետիք Մաթևոսյանը ՀՀ մեծահասակների առաջնությանը իր թիմին բերել է հերթական ոսկե մեդալը: