Վրաստանի վարչապետի այցից առաջ՝ Հայաստանում տեղի է ունեցել ԱԽ նիստ․ Հակոբ Բադալյան

Երեւանում այսօր կկայանա հայ-վրացական միջկառավարական հանձնաժողովի նիստ, որը կվարեն երկու երկրների վարչապետները: Առավել էական կլինի թերեւս նրանց առանձնազրույցը: Այս մասին իր ֆեյսբուքյան էջում գրել է քաղաքական մեկնաբան Հակոբ Բադալյանը;

«Մի քանի օր առաջ այցելելով Բաքու, Վրաստանի վարչապետ Կոբախիձեն հայտարարել էր, որ Վրաստանը Հայաստանին ու Ադրբեջանին առաջարկում է տնտեսական եռակողմ գործակցության ֆորմատ: Կոբախիձեն չի ներկայացրել մանրամասներ, թե հատկապես ինչ է իրենից ներկայացնելու այդ առաջարկը: Մեծ հավանականությամբ, այսօր նա դրանք կներկայացնի Երեւանին:

Ի դեպ, ուշադրության է արժանի, որ Վրաստանի վարչապետի այցից առաջ՝ նախօրեին, Հայաստանում տեղի է ունենում անվտանգության խորհրդի նիստ: Առավել եւս ուշագրավ էր նիստի մասին հաղորդագրությունը, որտեղ նշվում էր, որ քննարկվել են խորհրդի «իրավասության ներքո» գտնվող հարցեր: Բնական է, որ չէին քննարկվելու ջրմուղի իրավասության ներքո գտնվող հարցերը: Մյուս կողմից, կախված ռակուրսից՝ ԱԽ իրավասության ներքո կարող է դիտարկվել ցանկացած հարց: Ըստ այդմ, այդպիսի ձեւակերպումներով, առանց թեկուզ ընդհանուր ոլորտային ուղղություն նշմարող ձեւակերպումը վկայում է, որ քննարկված հարցը կամ հարցերը հանրությանը հարկ չի համարվել մատուցել նույնիսկ ընդհանուր ոլորտային նախանշման:

Հետեւաբար, կարող ենք դիտարկել հնարավոր տարբերակ, որ ԱԽ նիստում կարող էր շոշափվել Վրաստանի վարչապետի սպասվող այցի հետ կապված օրակարգ եւ այսպես ասած մշակվել որոշակի դիրքորոշում՝ նախնական տեղեկատվության հիման վրա:

Կրկնեմ, սա իմ դիտարկումն է, որը հիմնված է Վրաստանի վարչապետի՝ Բաքվում արած հայտարարության վրա, ինչպես նաեւ նրա այցի նախօրեին Հայաստանում ԱԽ նիստի անցկացման ժամանակագրական ու նիստի մասին պաշտոնական հաղորդագրության բովանդակային հանգամանքի վրա»: