Ինչու է Մակրոնը դարձել ֆրանսիացիների զայրույթի պատճառը

Աշխարհաքաղաքական քարտեզները խառնելուց մեկ շաբաթ անց, Դոնալդ Թրամփի և Վլադիմիր Զելենսկու լարված հանդիպումից և ԱՄՆ-ի կողմից Ուկրաինային ռազմական օգնություն ցուցաբերելու դադարից հինգ օր անց, Էմանուել Մակրոնը որոշել է դիմել ֆրանսիացիներին, գրում է Le Point-ը՝ հրապարակելով զայրացած ընթերցողների մեկնաբանությունները:

«ԱՄՆ-ն Ուկրաինային ավելի ու ավելի քիչ աջակցություն է ցուցաբերում և միևնույն ժամանակ մտադիր է մաքսային սակագներ սահմանել։ Մենք մտնում ենք նոր դարաշրջան։ Ռուսաստանը խախտում է մեր սահմանները, սպանում է իր ընդդիմախոսներին, մանիպուլյացիայի է ենթարկում մեր ընտրությունները և, ըստ էության, փորձարկում է մեր ամրության սահմանները», - հայտարարել Է Ֆրանսիայի նախագահը: 

Բախվելով նման «վտանգավոր աշխարհին՝ խելագարություն կլիներ պարզապես դիտորդ մնալ։ Մենք պետք է օգնենք ուկրաինացիներին դիմադրել այնքան ժամանակ, քանի դեռ նրանք չեն կարողացել պայմանավորվել Ռուսաստանի հետ կայուն խաղաղության մասին»:

Պետության ղեկավարը կոչ է արել «երկարաժամկետ աջակցություն ցուցաբերել ուկրաինական բանակին» և նախատեսել է «խաղաղության ստորագրումից հետո եվրոպական ուժերի ծավալում»:

Մակրոնը խոստացել է «ներդրումներ» կատարել պաշտպանության ոլորտում՝ «առանց հարկերի բարձրացման»:

Նա ընդգծել է, որ Ֆրանսիան հատուկ կարգավիճակ ունի՝ ունենալով «Եվրոպայի ամենաարդյունավետ բանակը» և «միջուկային զսպման ներուժը»:  

Ինչ վերաբերում է առևտրային պատերազմին, ապա Էմանուել Մակրոնը պատրաստում է Եվրոպայի «պատասխանը», բայց դեռ հույս ունի համոզել Դոնալդ Թրամփին:

«Այս մարտահրավերների և անդառնալի փոփոխությունների պայմաններում մենք չպետք է տրվենք ոչ պատերազմ հրահրողների, ոչ պարտվողների որևէ սադրանքի», - եզրափակել է նախագահը: