Եվրոպայի անվտանգությանն առնչվող բոլոր քայլերը պետք է ծրագրվեն Թուրքիայի հետ համատեղ. Էրդողան

Եվրոպայի անվտանգությունը վերաբերում է բոլորին, ոչ միայն ԵՄ անդամ երկրներին:

Ինչպես հայտնում է Yeni Şafak-ը, այս մասին հայտարարել է Թուրքիայի նախագահ Ռեջեփ Թայիփ Էրդողանը ԵՄ-ի կողմից կազմակերպված «Համախոհ երկրների առաջնորդների առցանց հանդիպմանը»։

Նշելով, որ Ուկրաինայի և Ռուսաստանի միջև պատերազմը պետք է ավարտվի, Էրդողանն ասել է. «Մենք վճռականորեն աջակցել ենք Ուկրաինայի տարածքային ամբողջականությանը և անկախությանը։ Մենք ձգտում ենք ամուր դիվանագիտության, որտեղ երկու կողմերն էլ նստում են բանակցությունների սեղանի շուրջ պատվավոր խաղաղության համար: Մենք աջակցում ենք հարձակումները դադարեցնելու գաղափարին։ Սև ծովում կոնսենսուսի հասնելու մեր ջանքերը նույնպես համընկնում են այս մոտեցման հետ»:

Էրդողանը նշել է, որ իր երկրի ռազմարդյունաբերական համալիրը պատրաստ է նպաստել ԵՄ պաշտպանական արդյունաբերության և եվրոպական անվտանգության ամրապնդմանը։

«Մենք կարծում ենք, որ մեր ընդհանուր շահերից կլինի Թուրքիայի հետ միասին ծրագրել եվրոպական անվտանգությունն ապահովելու բոլոր քայլերը։ Այս բոլոր ջանքերում, անկասկած, կարևոր է առավելագույնս պահպանել անդրատլանտյան կապերը և ստանալ մեր դաշնակից Ամերիկայի ամուր աջակցությունը։ Մեր պաշտպանական արդյունաբերությունն իր առաջադեմ տեխնոլոգիաներով պատրաստ է նպաստել Եվրոպայի պաշտպանական հատվածի հզորացմանը»,- ասել է նա։

«Կարևոր է, որ մենք մասնակցենք նաև Ուկրաինայի վերականգնման և վերակակառուցման ԵՄ ծրագրերին»,- հավելել է Թուրքիայի ղեկավարը։

«Մենք պահպանում ենք լիիրավ անդամակցության մեր նպատակը: Մենք ակնկալում ենք, որ ԵՄ-ն կընդունի ռազմավարական ու հեռանկարային դիրքորոշում և կվերսկսի մեր անդամակցության շուրջ բանակցությունները»,- եզրափակել է պետության ղեկավարը։