Կիևում Թրամփի անունը կրող սրճարանները կվերանվանվեն

Կիևի կենտրոնում գտնվող երկու սրճարաններ, որոնք կրում են ԱՄՆ նախագահ Դոնալդ Թրամփի անունը, կվերանվանվեն Ուկրաինային ռազմական օգնությունը դադարեցնելու Վաշինգտոնի որոշումից հետո։ Այս մասին հայտնում է բրիտանական The Sun թերթը։

Մինչ այժմ հաստատությունները կոչվում էին Trump Coffee Bar և Trump Pizza Station։

Նշվում է, որ հաստատությունների սեփականատերը հրամայել է հեռացնել Թրամփի անունը կրող ցուցանակները անմիջապես այն բանից հետո, երբ ԱՄՆ-ն հրաժարվել է Ուկրաինային զենք և հետախուզական տվյալներ տրամադրել։

Մարտի 4-ին Միացյալ Նահանգները դադարեցրեց Ուկրաինային տրամադրվող ողջ ռազմական օգնությունը, այդ թվում՝ Լեհաստանով տարանցիկ զենքը: Որոշումը հաջորդել է փետրվարի 28-ին Սպիտակ տան Օվալաձև աշխատասենյակում ԱՄՆ նախագահ Դոնալդ Թրամփի և Ուկրաինայի նախագահ Վոլոդիմիր Զելենսկու լարված հանդիպմանը։ Այս հանդիպման ժամանակ ամերիկացի առաջնորդը դժգոհություն է հայտնել Ուկրաինայի նախագահի կողմից ԱՄՆ-ի օգնության համար երախտագիտության բացակայության կապակցությամբ։ Թրամփն ասել է, որ դադար կլինի, «մինչև ուկրաինացի առաջնորդները խաղաղությանն անկեղծ նվիրվածություն դրսևորեն»։