Կուրսկի մարզում ուկրաինական բանակի համար «կրիտիկական իրավիճակ» է ստեղծվել. Bild

Կուրսկի մարզում ուկրաինա-ռուսական սահմանին իրավիճակը կտրուկ սրվել է: Ռուսական զորքերն օգտվելով ԱՄՆ-ից հետախուզական տեղեկությունների փոխանցման ընդհատումից, խոշոր հարձակում են ձեռնարկել։

Ըստ գերմանական Bild պարբերականի՝ ՌԴ ԶՈւ ստորաբաժանումներն արդեն գրավել են Լեբեդևկա ավանն ու Պորեչնոյե գյուղը։ Տեղեկություններ կան նաև Մալայա Լոկնյա քաղաքի ուղղությամբ առաջխաղացման մասին: Սոցցանցերում հրապարակված տեսանյութերում երևում է, թե ինչպես են ռուսական զորքերը ծածանում դրոշները, իսկ ուկրաինացի մարտիկները ստիպված են նահանջել իրենց դիրքերից։

Կիևում Bild-ի աղբյուրները նշում են, որ Ուկրաինայի զինված ուժերի համար Կուրսկի մարզում «կրիտիկական իրավիճակ» է ստեղծվել։ Ուկրաինական բանակը փորձում է խուսափել շրջապատումից՝ նահանջելով դեպի վերջին վերահսկվող քաղաք՝ Սուջա։ Միաժամանակ, ըստ ուկրաինացի զինվորականների, Սուջան այժմ գրեթե ամբողջությամբ ոչնչացված է ռուսական ավիացիայի կողմից։