Բուենոս Այրեսում բողոքի ցույցերի ժամանակ 150 մարդ է ձերբակալվել

Բուենոս Այրեսի կենտրոնում ցույցերի ժամանակ 150 մարդ է ձերբակալվել, LN+ հեռուստաալիքին տված հարցազրույցում ասել է Արգենտինայի անվտանգության նախարար Պատրիսիա Բուլրիխը։

«15-17 ոստիկան վիրավորվել է, 150 մարդ բերման է ենթարկվել... Այս ցույցին եկած մարդկանցից շատերը՝ երկրպագուներ, ձախեր (ձախ ուժերի ներկայացուցիչներ - խմբ.) եկել էին սպանելու պատրաստ»,- РИА Новости-ի փոխանցմամբ՝ ասաց նա։

Չորեքշաբթի օրը Արգենտինայի մայրաքաղաքի կենտրոնում՝ Կոնգրեսի շենքի մոտ, բողոքի ցույց է տեղի ունեցել, որին մասնակցել են թոշակառուները՝ իրենց համար ավելի լավ կենսապայմանների օգտին, ինչպես նաև երկրի բազմաթիվ ֆուտբոլային ակումբների երկրպագուները, ովքեր եկել էին նրանց աջակցելու:

Հրապարակում և հարակից փողոցներում հավաքվել է մոտ 2 հազար մարդ։ Կենսաթոշակառուները դժգոհ են կենսաթոշակների ցածր մակարդակից և կյանքի թանկությունից.

Բախումները ոստիկանության հետ սկսվել են ցույցի գրեթե հենց սկզբից։ Հետագայում առանձին բախումները վերաճեցին անկարգությունների։ Ցուցարարները, հիմնականում երիտասարդներ, փայտեր, շշեր ու քարեր են նետել ոստիկանների ուղղությամբ։ Ոստիկանությունն արցունքաբեր գազ և ջրցան մեքենաներ է կիրառել։ Ցուցարարները փորձել են բարիկադներ կառուցել և այրել ոստիկանական մեքենան և աղբամանները:

Թարգմանությունը՝ Մանուել Թամազյանի