Volkswagen-ը մտադիր է ռազմական մեքենաներ արտադրել

Գերմանական Volkswagen ավտոարտադրողը պատրաստ է աջակցել Եվրոպայի պաշտպանունակության աճին, քանի որ Հին աշխարհի երկարամյա դաշինքը Միացյալ Նահանգների հետ գնալով ավելի է լարվում ԱՄՆ նախագահ Դոնալդ Թրամփի գործողությունների պատճառով: Այս մասին հայտնում է Bloomberg գործակալությունը։

Առայժմ կոնկրետ քննարկումներ չեն եղել, սակայն գերմանական ավտոարտադրողը պատրաստ է խորհրդատվություն տալ այլ արտադրողներին ռազմական մեքենաների մշակման և արտադրության վերաբերյալ։ Տեղեկությունը հաստատել է Volkswagen-ի գործադիր տնօրեն Օլիվեր Բլյումը Վոլֆսբուրգի կենտրոնակայանում կայացած ամենամյա մամուլի ասուլիսում։

«Մենք ավտոմոբիլային ոլորտում փորձ ունենք և պատրաստ ենք նաև խորհրդատվություն տրամադրել»,- ասել է Բլումը։

Եվրոպացի առաջնորդները խոստացել են Ուկրաինային աջակցելու համար մեծացնել պաշտպանական ծախսերը այն բանից հետո, երբ Թրամփը դադարեցրեց ռազմական օգնությունը և հետախուզական տվյալների փոխանակումը ուկրաինական զորքերի հետ:

Եվրոպայի խոշորագույն ավտոարտադրողը փորձ ունի պաշտպանական ոլորտում։ Երկրորդ համաշխարհային պատերազմի ժամանակ նացիստների համար ռազմական մեքենաներ արտադրելուց բացի՝ ընկերությունը մշակել և արտադրել է Volkswagen Type 181-ը Արևմտյան Գերմանիայի բանակի, իսկ ավելի ուշ Մեծ Բրիտանիայի և ԱՄՆ-ի քաղաքացիական հաճախորդների համար, որտեղ մոդելը ստացել է The Thing անունը: