Թուրքիայում ԵՄ-ին անվանել են «հիվանդ մարդ»

Եվրամիությունը Թուրքիայի նկատմամբ իրեն երկերեսանու պես է պահում, նա Անկարային ժողովրդավարության դասեր տալու իրավունք չունի։ Այս մասին X սոցիալական ցանցում հայտարարել է Թուրքիայի նախագահի ավագ խորհրդական Մեհմեդ Ուչումը` մեկնաբանելով Եվրախորհրդարանում Թուրքիայի հարցով զեկուցող Նաչո Ամորի զեկույցը։

Ուչումը մեջբերել է Ամորի խոսքերը, որ միությունը բաց է Թուրքիայի հետ պաշտպանական կապերի զարգացման համար, «սակայն անդամակցությունը հորիզոնում չէ»:

Ռեջեփ Թայիփ Էրդողանի խորհրդականն ասել է, որ ԵՄ-ն ցանկանում է, որ Անկարան թուլացնի ահաբեկչության դեմ պայքարը թե՛ օրենսդրության, թե՛ ռեալիզացիայի առումով, ինչը, նրա կարծիքով, լավ մտադրություն չէ։

Նրա խոսքով՝ Եվրամիությունը գործում է բացարձակապես կեղծավոր կերպով և երեսպաշտորեն, իսկ Եվրախորհրդարանի զեկուցողի հայտարարությունները մեծամտություն են և «գաղութային մտածելակերպից ծնված»։ 

«Եվրամիությունը մեր ժամանակի հիվանդ մարդն է։ Նրանք, ովքեր խոսում են այս հիվանդի անունից, նախ պետք է իրենց նայեն։ Հիվանդ մարդը՝ Եվրամիությունը, չի կարող Թուրքիային ժողովրդավարության և իրավունքի դասեր տալ։ Թող իրենք զբաղվեն ժողովրդավարության և իրավունքի սեփական ճգնաժամերով։ Թող սոցիալական արդարության հարցերին նայեն»,- եզրափակել է Ուչումը։