Զելենսկին պատասխանել է էներգետիկ ենթակառուցվածքներին հարվածները դադարեցնելու առաջարկին

Ուկրաինան աջակցում է ուկրաինական էներգետիկ ենթակառուցվածքներին Ռուսաստանի հարվածները դադարեցնելու առաջարկին։ Սակայն անհրաժեշտ է իմանալ բոլոր մանրամասները, հայտարարել Է Ուկրաինայի նախագահ Վլադիմիր Զելենսկին մամուլի ասուլիսի ժամանակ, հաղորդում է РБК-Украин-ան։

Ուկրաինայի նախագահը նշել է, որ կցանկանար մանրամասներ լսել Ուկրաինական էներգետիկ ենթակառուցվածքներին Ռուսաստանի հարվածները դադարեցնելու առաջարկի վերաբերյալ:

«Ես կցանկանայի ավելի շատ մանրամասներ լսել: Առավել ևս, որ ամերիկյան կողմը խմբերին առաջարկում է հանդիպել Մերձավոր Արևելքում։ Ես հասկանում եմ, որ խոսքը գնում է Սաուդյան Արաբիայի մասին։ Մենք աջակցում ենք պատերազմի ավարտի բոլոր քայլերին։ Բայց ինչ-որ բան պահպանելու համար պետք է հասկանալ՝ կոնկրետ ինչը։», - ասել է Զելենսկին։

Միևնույն ժամանակ նա ընդգծել է, որ Ուկրաինան և Ռուսաստանը ամերիկյան կողմի միջնորդությամբ կարող են պայմանավորվել չհարվածել էներգետիկ ենթակառուցվածքին:

«Չի կարող այնպես լինել, որ Ռուսաստանը հարվածի մեր էներգետիկ ենթակառուցվածքներին, իսկ մենք լռենք։ Մենք կպատասխանենք: Բայց երկու կողմերը՝ ուկրաինական և ռուսական, կարող են չհարվածել։ Մեր կողմը կաջակցի դրան։ Դա երկնքի և ծովի մեր առաջարկի մի մասն է: Ամերիկյան կողմի միջնորդությամբ, եթե նրանք այդ լռության կատարման վերահսկողության երաշխավորներն են», - հավելել է նա։