Ռուսաստանին չի կարելի թույլ տալ հասնել Ուկրաինայում իր նպատակներին․ Չեխիայի նախագահ

Ռուսաստանին չի կարելի թույլ տալ Ուկրաինայում հասնել իր բոլոր նպատակներին։ Այս մասին «Մեր անվտանգությունն ինքնին հասկանալի չէ» խորհրդաժողովում հայտարարել Է Չեխիայի նախագահ Պյոտր Պավելը, փոխանցում է EADaily-ն։

Նրա խոսքով՝ Եվրոպայում անվտանգության ապահովման համար անհրաժեշտ է շարունակել աջակցություն ցուցաբերել Ուկրաինային՝ առավելագույն արդար խաղաղության հասնելու համար, որպեսզի հակամարտության զարգացումը չհանգեցնի ՌԴ-ի բոլոր նպատակների իրականացմանը և «զոհի կապիտուլյացիային»:

Այս կապակցությամբ նա բարձր է գնահատել այն փաստը, որ Չեխիան միացել է ձևավորվող «ցանկացողների կոալիցիային»։ Պյոտր Պավելը կարծում է, որ նման կոալիցիաներ կարող են ավելի շատ առաջանալ, և դրանք պետք է պատրաստվեն Ուկրաինային ռազմական, քաղաքական, դիվանագիտական, նյութական և ֆինանսական օգնություն ցուցաբերելուն՝ ինչպես ԱՄՆ-ի մասնակցությամբ, այնպես էլ առանց:

Պավելը նաև նշել է, որ Չեխիան և Եվրոպան միշտ նախապատվությունը տալու են ԱՄՆ-ի հետ համատեղ աշխատանքին, սակայն անհրաժեշտ է պատրաստ լինել համապատասխան կերպով արձագանքելու, եթե ԱՄՆ-ն որոշի գնալ այլ ճանապարհով:

Չեխիայի նախագահը նկատել է, որ «աշխարհաքաղաքական փոփոխությունները վերաբերում են ոչ միայն պետություններին, այլև մեծ մասամբ բոլոր քաղաքացիներին»:

Նա բարձր է գնահատել չեխերի դիրքորոշումն Ուկրաինայի հակամարտության վերաբերյալ, որոնք ի սկզբանե դատապարտել են Ռուսաստանին և կամք են ցուցաբերել օգնելու Կիևին, օրինակ, ռազմական տեխնիկայի համար միջոցներ հավաքելու և հումանիտար և բժշկական օգնություն տրամադրելու միջոցով: