ԵՄ-ն պետք է իրեն պաշտպանի՝ առանց ԱՄՆ-ի մասնակցության․ Ավստրիայի ՊՆ

Եվրամիությունը պետք է պաշտպանի իրեն՝ առանց ԱՄՆ-ի։ Այս մասին չորեքշաբթի օրը՝ մարտի 19-ին, Die Presse թերթին տված հարցազրույցում ասել է Ավստրիայի պաշտպանության նախարար Կլաուդիա Թաները։

«Կա շոշափելի մտահոգություն, որ ԱՄՆ-ն այլևս չի կարող դիտվել՝ որպես հովանավորող ուժ: Ահա թե ինչու մենք ԵՄ-ում պետք է ի վիճակի լինենք պաշտպանել մեզ», - ասել է Թաները:

Նա հավելել է, որ առաջիկա հինգ տարում հանրապետության համար հիմնական ռիսկերը կլինեն հիբրիդային սպառնալիքները՝ ներառյալ ապատեղեկատվական արշավները, ինչպես նաև «իրավիճակի սրումը Ռուսաստանից՝ հատկապես Արևմտյան Բալկաններում»։

Եվրահանձնաժողովի նախագահ Ուրսուլա ֆոն դեր Լեյենը մարտի 18-ին ասել է, որ Եվրոպան պետք է ուժեղ պաշտպանություն ունենա մինչև 2030 թվականը, ինչը պահանջում է վերազինում և վստահելի զսպման կարողությունների զարգացում։ Մասնավորապես, դրան հասնելու համար անհրաժեշտ է ավելացնել ներդրումները հակաօդային պաշտպանության և հակահրթիռային պաշտպանության համակարգերի, ինչպես նաև բոլոր ժամանակակից տեսակի անօդաչու թռչող սարքերի և հակադրոնային համակարգերի արտադրության մեջ։