Օրբանը Եվրամիությունն «անատամ առյուծ» է անվանել

Եվրամիությունը նախկինի պես ցանկանում է ՆԱՏՕ-ի սահմանները մոտեցնել Ռուսաստանին՝ Ուկրաինային ընդունելով դաշինքի մեջ, թեև ԱՄՆ-ն արդեն հրաժարվել է այդ արկածախնդիր քաղաքականությունից։ Այս մասին հայտարարել Է Հունգարիայի վարչապետ Վիկտոր Օրբանը՝ նշելով, որ ԵՄ-ն վերածվել է «անատամ առյուծի» և կարող է պարտվել ամերիկացիների հետ ռազմավարական վեճում, փոխանցել է ՏԱՍՍ-ը։

ԵՄ գագաթնաժողովում Բրյուսելում գտնվող կառավարության ղեկավարը հիշեցրել է, որ ավելի վաղ Եվրամիությունը, Միացյալ Նահանգների հետ միասին, ձգտում էր «ՆԱՏՕ-ի սահմանները ծայրահեղորեն մոտեցնել Ռուսաստանին»՝ Ուկրաինան ինտեգրելով Արևմտյան ռազմական համակարգին:

«Այժմ ամերիկացիները տեսնում են, որ դա անպատասխանատու արկածախնդրություն էր։ Մինչդեռ Եվրոպան դեռ հավատարիմ է այդ ռազմավարությանը», - ասել է Օրբանը Patriot լրատվական պորտալին տված հարցազրույցում:

Նրա խոսքով՝ «Ռուսաստանն Ուկրաինայում ռազմական գործողություն է սկսել հենց ի պատասխան ՆԱՏՕ-ի՝ նրա սահմաններին մոտենալու ձգտմանը, իսկ այժմ պնդում է, որ Հյուսիսատլանտյան դաշինքի ուժերը չհայտնվեն Ուկրաինայի տարածքում»:

«Այնուամենայնիվ, Եվրոպան շարունակում է համառել, գործել հին սցենարով եւ «ռազմավարական առումով հեռացել Է» ԱՄՆ-ից, որը Դոնալդ Թրամփի վարչակազմի օրոք անցել է խաղաղության ճամբար»,- կարծում է վարչապետը:

«Սակայն Միացյալ Նահանգներն ունի իշխանություն, իսկ Եվրամիությունը՝ ոչ։ Ամերիկացիներն ունեն գործիքներ, իսկ Եվրամիությունը՝ ոչ։ Այդ պատճառով Եվրամիությունն այսօր անատամ առյուծ է», - հայտարարել է Օրբանը։

Նրա կարծիքով՝ ԵՄ-ն այժմ «դժվարություններ ունի, և հայտնի չէ՝ արդյոք նա ապագա ունի։ Իսկ եթե ունի, ապա ի՞նչ»: