Զելենսկին ժամանակավոր հրադադարի մասին պայմանավորվածությունները «հետ քայլ» է անվանել

Ուկրաինայի նախագահ Վլադիմիր Զելենսկին Ռուսաստանի առաջնորդ Վլադիմիր Պուտինի և ԱՄՆ նախագահ Դոնալդ Թրամփի զրույցի ընթացքում ձեռք բերված հրադադարի մասին համաձայնագիրը հետընթաց է անվանել։ Նրա խոսքերը մեջբերում է RBC-Ukraine-ն։

«Հերթական անգամ մարդիկ, ինձ թվում է, հետքայլ արեցին, քանի որ սկսեցին խոսել մասնակի  հրադադարի մասին: Մենք պատրաստ ենք ավելի լավ քայլեր անել առաջ»,- ասել է Զելենսկին։

Միաժամանակ նա նշել է, որ եթե Սպիտակ տան ռազմավարությունը պահանջում է հետքայլեր կատարել, ապա Ուկրաինան ստիպված կլինի համաձայնել դրանց հետ։

Մարտի 18-ին Վլադիմիր Պուտինն ու Դոնալդ Թրամփն անցկացրել են իրենց երկրորդ պաշտոնապես հաստատված հեռախոսազրույցը։ Ինչպես հաղորդում է Կրեմլի մամուլի ծառայությունը, զրույցի ընթացքում ՌԴ ղեկավարը համաձայնել է իր օտարերկրյա գործընկերոջ առաջարկին Մոսկվայի և Կիևի կողմից 30 օրով էներգետիկ ենթակառուցվածքի օբյեկտներին հարվածներից փոխադարձ հրաժարվելու վերաբերյալ։

Նախօրեին Ուկրաինայի նախագահ Վլադիմիր Զելենսկին համաձայնել էր Թրամփի առաջարկին՝ դադարեցնել հարվածները հակամարտող կողմերի էներգետիկ օբյեկտներին։ Ինչպես նշել է Bloomberg-ը, այս մասին Ուկրաինայի առաջնորդը հայտարարել է մարտի 19-ին Սպիտակ տան ղեկավարի հետ հեռախոսազրույցի ժամանակ։

Թարգմանությունը՝ Մանուել Թամազյանի