Թուրքիայում ադրբեջանական ԶԼՄ–ներին մեղադրել են ապատեղեկատվություն տարածելու մեջ

Թուրքիայի նախագահի աշխատակազմում հայտարարել են, որ ադրբեջանական լրատվամիջոցները ապատեղեկատվություն են տարածում Մարգարայի սահմանային անցակետի բացման վերաբերյալ։

Թուրքիայի նախագահի աշխատակազմի՝ ապատեղեկատվության դեմ պայքարի կենտրոնը հայտարարություն է տարածել, ըստ որի՝ ադրբեջանական ԶԼՄ-ներում  տարածված այն տեղեկությունը, թե իբր Ադրբեջանը պաշտոնապես տեղեկացված չի եղել Սիրիա մարդասիրական օգնություն հասցնելու մասին, չի համապատասխանում իրականությանը։

Հայտարարության մեջ նշվում է, որ Թուրքիայում Ադրբեջանի դեսպան Ռաշադ Մամեդովը և նախագահի օգնական Հիքմեթ Հաջիևը տեղեկացվել են Հայաստանի կողմից Սիրիա մարդասիրական օգնություն ուղարկելու մասին։

«2025 թվականի փետրվարի 24-ին Անկարայում Ադրբեջանի դեսպան Ռաշադ Մամեդովին դեսպան Սերդար Քըլըչը ուղղակիորեն տեղեկացրել է մեր երկրի միջոցով Սիրիա մարդասիրական օգնություն հասցնելու Հայաստանի ցանկության մասին, 2025 թվականի փետրվարի 26-ին Ադրբեջանի նախագահի օգնական Հիքմեթ Հաջիևը նույնպես տեղեկացվել է դրա մասին մեր երկիր կատարած այցի ժամանակ», - ասված է հայտարարության մեջ։

Բացի այդ, հայտարարության մեջ ընդգծվում է, որ սահմանային անցակետը վերջին անգամ օգտագործվել է 2023թ.
փետրվարի 6-ի երկրաշարժից հետո Հայաստանից ուղարկված մարդասիրական օգնությունը հասցնելու համար։

Նշվում է նաև, որ անցակետն օգտագործվել է հատուկ ներկայացուցիչների 5-րդ հանդիպման, ինչպես նաև սահմանային հանձնաժողովների նիստերի ժամանակ հետիոտնային անցումների համար։