Ուկրաինայում գազի պաշարների նվազման պատմական ռեկորդ է գրանցվել

Մարտի 22-ին Ուկրաինայում գազի պաշարները նվազել են 1 միլիարդ խորանարդ մետրից: GIE հարթակի տվյալներով՝ երկրի ստորգետնյա գազապահեստարաններում ակտիվ վառելիքի ծավալը կազմել է 987 մլն խմ։ Սա Ուկրաինայում գազի նվազագույն պաշարների նոր պատմական ռեկորդ է։

Ջեռուցման սեզոնի ավարտին մեկ շաբաթ է մնացել և, ըստ ամենայնի, երկիրն այն կավարտի՝ առանց արտակարգ միջադեպերի։ Օրական արդյունահանումը իջել է 20 մլն խմ-ից:

Անցնող ձմեռը ջերմաստիճանային առումով եզակի չէր։ Ջեռուցման այս սեզոնի ընթացքում Ուկրաինան ավելի քիչ գազ է սպառել, քան նախորդում (համապատասխանաբար 7,3 մլրդ խմ և 8,6 մլրդ խմ)։ Սակայն մինչ այս ձմեռը Ուկրաինայի «Նավթոգազը» գազ չէր ներկրում՝ խոստանալով սեզոնը հաղթահարել ներքին արտադրության գազով։ Արդյունքում՝ Ուկրաինան ձմեռ է մտել պատմության մեջ ամենացածր գազի պաշարներով։

Փետրվարից ազգային ընկերությունը ստիպված է եղել վերսկսել գնումները արտերկրից և, ըստ Ուկրաինայի Գազի փոխանցման համակարգի օպերատորի, այս ընթացքում երկիր զուտ ներմուծումը կազմել է գրեթե 530 մլն խմ: Սակայն դա չի փրկել պահեստարանները դատարկվելուց։

Ուկրաինայի գազի փոխանցման համակարգի օպերատորի նախկին տնօրեն Սերգեյ Մակոգոնը Telegram-ի իր ալիքում գրել է, որ փետրվարին «Նավթոգազը» և նրա դուստր ձեռնարկությունը՝ «Ուկրտրանսգազը», եվրոպական վառելիքի համար վճարել են ռեկորդային 750-800 դոլար հազար խորանարդ մետրի համար։