ԱՄՆ-ը կարող է հետևել էներգետիկ օբյեկտներին հարվածների արգելքի խախտմանը․ Կրեմլ

Վաշինգտոնը հնարավորություն ունի վերահսկելու էներգետիկ ենթակառուցվածքներին չհարվածելու պայմանագրի խախտման հետ կապված իրավիճակը և համապատասխան եզրակացություններ անելու։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։

«Մենք շատ ուշադիր հետևում ենք իրավիճակին։ Դե, փաստորեն, մեր ամերիկացի գործընկերները նույնպես կարող են հետևել դրան և համապատասխան եզրակացություններ անել»,- ասել է Պեսկովը, փոխանցում է ՏԱՍՍ-ը։

Ինչպես հաղորդվում է, մարտի 18-ին Ռուսաստանի և ԱՄՆ նախագահներ Վլադիմիր Պուտինը և Դոնալդ Թրամփը հեռախոսազրույց են ունեցել, որում քննարկել են Ուկրաինայում տիրող իրավիճակը, էսկալացիայի կանխման պայմանները և մի շարք միջազգային հարցեր։ Պուտինը համաձայնել է ամերիկացի առաջնորդի առաջարկին Ուկրաինայում հակամարտող կողմերի կողմից էներգետիկ ենթակառուցվածքի օբյեկտներին հարվածներից 30 օրով փոխադարձ հրաժարվելու վերաբերյալ և հրաման է տվել ՌԴ պաշտպանության նախարարությանը։ Ավելի ուշ Վոլոդիմիր Զելենսկին ասել է, որ Ուկրաինան կաջակցի էներգետիկ ենթակառուցվածքների վրա հարձակումները դադարեցնելու առաջարկին։

Միևնույն ժամանակ, մարտի 19-ի գիշերը Կիևը երեք անօդաչու թռչող սարքերի միջոցով կանխամտածված հարձակում է իրականացրել Կրասնոդարի երկրամասի Կավկազսկայա գյուղում տեղակայված էներգետիկ ենթակառուցվածքի վրա։ Այնուհետև մարտի 21-ի գիշերը ուկրաինացի զինվորականները պայթեցրել են Սուջայի կայանը, որով Ռուսաստանից գազը նախկինում մատակարարվում էր Եվրոպա։