Բելառուսում զինծառայողների մարտական պատրաստության ստուգում են կազմակերպել

Բելառուսի զինված ուժերի մարտական պատրաստության ստուգումն սկսվել է մարտի 24-ին՝ երկրի նախագահ Ալեքսանդր Լուկաշենկոյի հանձնարարությամբ: Այս մասին հայտնել է Հանրապետության պաշտպանության նախարարությունը Telegram-ի պաշտոնական ալիքում։

«Բելառուսի Հանրապետության Անվտանգության խորհրդի պետական քարտուղարությունը սկսել է զինված ուժերի մարտական պատրաստության ստուգումը։ Զորամասերից մեկի անձնակազմը պետք է իրականացնի տեխնիկայի և սպառազինության պատրաստմանն ուղղված համալիր միջոցառումներ՝ ուսումնամարտական խնդիրների կատարման համար»,- ասված է հայտարարության մեջ:

Դրանից հետևում է, որ ստուգմանը ներգրավված ստորաբաժանումները պետք է մասնակցեն տվյալ տարածքում պաշտպանության միջոցառումներին։ Բացի այդ, զինվորները պետք է վարժեցնեն քողարկումը եւ ստուգողական հրաձգություն իրականացնեն սովորական զենքից։

Գերատեսչության տեղեկատվության համաձայն՝ Բելառուսի զինված ուժերի հրամանատարությունը հաշվի է առել ժամանակակից հակամարտությունների փորձը՝ զորավարժությունների շրջանակներում իրական մարտական գործողություններին մոտ միջավայր ստեղծելու համար։

Այդ կապակցությամբ վարժանքներին ներգրավվել են հարվածային և հետախուզական դրոնների հաշվարկներ, ինչպես նաև ավիացիա:

«Ստուգման ընթացքում նախատեսվում է ռազմական տեխնիկայի տեղաշարժ, հնարավոր է քաղաքացիական տրանսպորտի երթեւեկության ժամանակավոր սահմանափակում ընդհանուր օգտագործման ճանապարհներով եւ տեղանքի հատվածներով», - ընդգծվում է հրապարակման մեջ: