FT-ն պարզել է՝ ինչ ծրագիր է մշակել Իսրայելը Գազայի դեմ

Իսրայելի իշխանությունները պաղեստինյան ՀԱՄԱՍ շարժման վերջնական ջախջախման և Գազայի հատվածի «երկարատև օկուպացիայի» ծրագիր են մշակում: Այս մասին հայտնում է Financial Times-ը՝ հղում անելով իր աղբյուրներին։

Նրանց տեղեկատվության համաձայն՝ այդ գաղափարն առաջ է քաշել Իսրայելի պաշտպանության բանակի գլխավոր շտաբի նոր ղեկավար Էյալ Զամիրը՝ կառավարության ծայրահեղ աջ հայացքներ ունեցող անդամների աջակցությամբ, որոնք պահանջում են ՀԱՄԱՍ-ի դեմ պայքարի ավելի արմատական մարտավարության մշակում, որը սկսել է վերականգնել անկլավի նկատմամբ վերահսկողությունը հրադադարի ռեժիմի ուժի մեջ մտնելուց հետո:

Պաշտոնյաների գնահատականներով՝ արմատականներին ջախջախելու և Գազայի օկուպացիայի ծրագիր իրականացնելու հնարավորությունը ի հայտ է եկել ԱՄՆ-ում իշխանափոխությունից հետո, քանի որ Դոնալդ Թրամփի վերադարձը Սպիտակ տուն «ազատեց Իսրայելին Բայդենի վարչակազմի համառ պահանջներից»՝ հրաժարվել անկլավը գրավելու և նրա տարածքը բռնակցելու հեռանկարից:

«Նախորդ վարչակազմը ցանկանում էր, որ մենք դադարեցնենք պատերազմը։ Թրամփը ցանկանում է, որ մենք հաղթենք պատերազմում», - նշել է պարբերականի զրուցակիցը։

Նրա գնահատականներով՝ ամերիկյան կողմը «խիստ շահագրգռված է», որ Իսրայելը հաղթի ՀԱՄԱՍ-ին։

Ինչպես գրում Է FT-ն, այդ ծրագրի իրականացումը կարող է հանգեցնել պաղեստինցիների վերաբնակեցմանը տարածքի էլ ավելի փոքր հատվածում, որտեղ նրանց գոյատևումը լիովին կախված կարող է լինել պարենային օգնությունից: Բացի այդ, Իսրայելի իշխանությունները մտադիր են փաստացի իրենց ձեռքը վերցնել անկլավի կառավարումն ու մարդասիրական օգնության բաշխումը:

Միևնույն ժամանակ, թերթի գնահատմամբ, նման փոփոխությունները կարող են հանգեցնել Գազայի բնակչության զինված ապստամբական դիմադրությանը:

Բացի այդ, ռազմական փորձագետների կարծիքով, պարզ չէ՝ կկարողանա արդյոք ՑԱԽԱԼ-ը մի քանի ամսվա ընթացքում հասնել իր նպատակին՝ հաշվի առնելով երկրի զինված ուժերի հյուծումը, որոնց անհրաժեշտ է առնվազն չորս դիվիզիա հատկացնել նման մասշտաբի ռազմական գործողություններին մասնակցելու համար: