Կես դար մահապատժի սպասող ճապոնացուն գրեթե 1,5 մլն դոլարի փոխհատուցում են նշանակել

Ճապոնական դատարանը կառավարությանը հանձնարարել է փոխհատուցում վճարել 89-ամյա Իվաո Հակամատային, ով անազատության մեջ է անցկացրել 47 տարի, իսկ հետո արդարացվել է: Այս մասին հայտնում է ճապոնական Kyodo գործակալությունը։

Հակամատայի փաստաբանները պահանջել են առավելագույն գումարը (217 մլն իեն կամ 1,44 մլն դոլար)՝ վկայակոչելով «վնասի անասելի չափը, որը նա կրել է հոգեպես եւ ֆիզիկապես, ինչպես նաեւ այն, որ նա գտնվել է մահապատժի վախի մթնոլորտում»:

Այս գումարը, հավանաբար, հանցագործության համար ամենաբարձր փոխհատուցումն է, որը երբևէ վճարվել է Ճապոնիայում:

Հակամատան նաև հայտնվել Է Գինեսի ռեկորդների գրքում որպես բանտարկյալ, որն աշխարհում ամենաերկար պատիժն է կրել մահապարտների խցում:

Իվաո Հակամատան ձերբակալվել է 1966 թվականին՝ իր ղեկավարին, նրա կնոջը և երկու երեխաներին կողոպտելու և սպանելու մեղադրանքով։ Հարցաքննությունից հետո նա խոստովանել է սպանությունը, սակայն դատարանում հայտարարել է, որ իրեն ստիպել են խոստովանական ցուցմունք տալ՝ կտտանքների ենթարկելով։ 2014 թվականին դատարանում ապացուցվել է, որ տղամարդու ԴՆԹ-ն չի համընկնում սպանության վայրում հայտնաբերված արյան գենետիկ նյութից ստացված ԴՆԹ-ի հետ: Այս որոշումից հետո ճապոնացին ազատ է արձակվել, սակայն 2023 թվականին Տոկիոյի բարձրագույն դատարանն ուժի մեջ է պահել ստորադաս ատյանների որոշումը՝ կրկնակի դատաքննության մասին։ 2024 թվականի սեպտեմբերին դատարանը կրկնակի լսումների ժամանակ արդարացրել էր ճապոնացուն։