Ավստրալիայում փնտրում են կոկորդիլոսներով լի գետն ընկած զբոսաշրջիկին

Ավստրալիայի իշխանությունները որոնողափրկարարական աշխատանքներ են իրականացնում մայրցամաքի հյուսիս-արեւմուտքում՝ Դրայսդեյլ գետում, որտեղ զբոսաշրջիկը ընկել է կոկորդիլոսներով լի գետը: Այս մասին հայտնում է The West Australian պարբերականը։ 

Գործակալության տվյալներով՝ որոնումները սկսվել են այն տեղեկություններից հետո, որ զբոսաշրջային խմբի կազմում ճանապարհորդող երկու մարդ ընկել են Դրայսդեյլ գետը: Ավելի ուշ փրկարարներին հաջողվել է հայտնաբերել կորածներից մեկին։ Նա կարողացել է ափ դուրս գալ եւ բարձրանալ ծառը, որտեղ նա փրկարարներին սպասել է մոտ 10 ժամ։

Երկրորդի որոնումները դեռ շարունակվում են։

Արեւմտյան Ավստրալիայի նահանգի հրշեջ պահպանության եւ արտակարգ փրկարարական ծառայությունների վարչության ներկայացուցիչը հայտնել է, որ ոստիկանության եւ փրկարար ծառայության աշխատակիցները կարողացել են դեպքի վայր ժամանել եւ որոնումները սկսել զբոսաշրջիկների անհետացումից մի քանի ժամ անց: Իսկ ավելի ուշ նրանց խնդիրն էապես բարդացրել են անձրևները, որոնք անանցանելի են դարձրել տարածքը։

«Այն տարածքը, որտեղ պետք է որոնումներ իրականացնել, չի կարելի ցամաքով հասնել ճահիճների պատճառով, իսկ անձրեւների պատճառով գետում ջրի մակարդակի բարձրացումը միայն վատթարացրել է իրավիճակը։ Սակայն մենք մնում ենք տեղում և ցերեկ, և գիշեր՝ օգտագործելով մեր ունեցած բոլոր ռեսուրսները որոնման համար», - նշել է DFES-ի աշխատակից Ջոն Հաթչիսոնը։