Դաշինքն իրավունք ունի արձագանքելու Ռուսաստանի պահանջներին. ՆԱՏՕ-ի գլխավոր քարտուղար

Հյուսիսատլանտյան դաշինքի երկրներն իրավունք ունեն ինքնուրույն «պատասխանել» դաշինքի ուժերը իր սահմաններին չմոտեցնելու Ռուսաստանի պահանջներին։ Այս մասին հայտարարել է ՆԱՏՕ-ի գլխավոր քարտուղար Մարկ Ռյուտեն, փոխանցում է РИА Новости-ն։

Ռուսաստանի նախագահ Վլադիմիր Պուտինը «կարող է իր հայեցողությամբ պահանջներ ներկայացնել բանակցությունների սեղանի շուրջ», - նշել է Ռյուտեն: Բայց Ռուսաստանի ղեկավարը «չի կարող մեզ ասել, թե ինչպես պետք է վարվենք մեր միջև՝ դաշինքի 32 անդամների մեջ», - շարունակեց գլխավոր քարտուղարը։

«Նա կարող է ներկայացնել իր պահանջները, բայց արձագանքելու մեր իրավունքն է»,- հավելել է Ռյուտեն։

Փետրվարին ՌԴ նախագահի մամուլի քարտուղար Դմիտրի Պեսկովը հայտարարել էր, որ տեղեկությունները, թե իբր Ռուսաստանը Սաուդյան Արաբիայում ռուս-ամերիկյան բանակցությունների ընթացքում, իբր, պահանջել է ՆԱՏՕ-ի զորքերը դուրս բերել Արևելյան Եվրոպայի երկրներից, չի համապատասխանում իրականությանը։

NBC-ն հաղորդում է, որ Պենտագոնի ղեկավար Փիթ Հեգսեթը, իբր, մասնավոր զրույցներում ուկրաինացի պաշտոնյաներին ասել է, որ Միացյալ Նահանգները դիտարկում է ամերիկյան զորքերի մեծ մասը Եվրոպայից դուրս բերելու հնարավորությունը:

Իր հերթին, Financial Times-ի սյունակագիր Գեդեոն Ռախմանը գրել է, որ ԱՄՆ-ը շուտով կարող է դուրս բերել ամերիկյան զորքերը Լատվիայից, Լիտվայից և Էստոնիայից՝ Ռուսաստանի հետ Ուկրաինայի շուրջ բանակցությունների ֆոնին: Լրագրողը նշել է, որ եվրոպացիները դադարել են Վաշինգտոնին դաշնակից տեսնել, որի վրա կարող են հույս դնել։

Թարգմանությունը՝ Lurer.com-ի