Զելենսկին չի ներկայացնում ուկրաինացիների հսկայական մասի շահերը. Լավրով

Ուկրաինայի ղեկավարները չեն ներկայացնում բնակչության ահռելի մասի շահերը։ Այս մասին «Վեստի» հաղորդմանը տված հարցազրույցում ասել է ՌԴ ԱԳ նախարար Սերգեյ Լավրովը, որի սղագրությունը հրապարակվել է ԱԳՆ կայքում։

«Նրանք, ովքեր այժմ ղեկավարում են Ուկրաինան արևմտյան հովանավորների «խամաճիկների» ներքո, չեն ներկայացնում բնակչության հսկա մասի շահերը», - ասել է դիվանագետը։

Նա ընդգծել է, որ Ղրիմն ու Դոնբասը վաղուց փակված հարցեր են՝ հաշվի առնելով այս տարածքներում հանրաքվեի արդյունքները։

Մարտի 26-ին Լավրովն ասել է, որ Ուկրաինայի նախագահ Վլադիմիր Զելենսկին տեղյակ է իր քաղաքական դիրքորոշման անորոշությանը։ Նախարարը ենթադրել է, որ Ուկրաինայի ղեկավարը հակված չէ փոխզիջումների՝ հասկանալով, որ իր աջակցությունը սահմանափակվում է ազգայնական հայացքներ ունեցող շրջանակներով։ Դիվանագետի խոսքով՝ Զելենսկու «պայծառ կերպարը», որը նա ակտիվորեն մշակել էր ավելի վաղ, կորցրել է իր գրավչությունը ուկրաինացիների մեծամասնության համար՝ «բացառությամբ բնակչության այն հատվածի, որն արտացոլում է արմատական, ուլտրաաջ, ռևանշիստական, Բանդերայի հայացքները»։

Թարգմանությունը՝ Մանուել Թամազյանի