Իսրայելը ձերբակալել է Նեթանյահուի գրասենյակի և Կատարի միջև կապերի մեջ կասկածվողներին

Իսրայելի վարչապետ Բենիամին Նեթանյահուի գրասենյակի և Կատարի պաշտոնյաների միջև ենթադրյալ կապերի մեջ կասկածվող երկու մարդ է ձերբակալվել և տարվել հարցաքննության։ Այս մասին հայտնել է ոստիկանության մամուլի ծառայությունը, գրում է ՌԻԱ Նովոստին:

«Միջազգային հետաքննությունների ազգային դեպարտամենտի կողմից թիվ 105021/2025 գործով անցկացված հետաքննության ընթացքում այսօր հարցաքննության համար ձերբակալվել է երկու կասկածյալ»,- ասված է հաղորդագրության մեջ։

Ոստիկանության հայտարարության մեջ չի նշվում ձերբակալվածների անունները, սակայն Իսրայելի Channel 12 հեռուստաալիքը հայտնել է, որ ոստիկանությունը ձերբակալել է Նեթանյահուի ավագ խորհրդական Յոնաթան Ուրիխին և Նեթանյահուի նախկին խոսնակ Էլի Ֆելդշտեյնին: Հեռուստաալիքը պնդում է, որ ձերբակալվածները ստիպված կլինեն ոստիկանությանը պատմել, թե «ով է իրենց գումար տրամադրել և արդյոք նրանք իսկապես աշխատել են Կատարի համար»։