ԱՄՆ-ն ավելի քան 200 հարված է հասցրել Եմենի հուսիթներին

ԱՄՆ-ն այս պահին արդեն «ավելի քան 200 հաջող հարված» է հասցրել Եմենի հյուսիսում իշխող «Անսար Ալլա» (հուսիթամ) շարժման օբյեկտներին։ Ինչպես հայտնում է «ՌԻԱ Նովոստին», այս մասին հայտարարել է Սպիտակ տան մամուլի քարտուղար Կարոլին Լեւիտը:

«Վերջին անգամ, երբ ես կանգնած էի այս ամբիոնին, ավելի քան 100 հաջող հարված էր: Այժմ արդեն ավելի քան 200 հաջող հարված է կատարվել  հուսիթների դեմ», - ասել է նա ճեպազրույցի ժամանակ։ 

Հիշեցնենք, որ ԱՄՆ նախագահ Դոնալդ Թրամփը մարտի 15-ին հրաման է տվել ամերիկացի զինվորականներին «վճռական և հզոր» գործողություններ ձեռնարկել հուսիթների դեմ, որոնց մինչ այդ նա ներառել էր ահաբեկչական կազմակերպությունների ցուցակում: ԱՄՆ ԶՈՒ կենտրոնական հրամանատարությունը հայտնել է, որ երկիրը Եմենում հուսիթների դեմ լայնածավալ գործողություն է սկսել ՝ ամերիկյան շահերը պաշտպանելու համար: Միացյալ Նահանգների առաջնորդը նաև կոչ է արել Իրանին դադարեցնել աջակցությունը հուսիթներին և չսպառնալ «ամերիկյան բնակչությանը և նրանց նախագահին»։