Ուկրաինան հրապարակել է ԱՄՆ-ի հետ հանածոների մասին համաձայնագրի հուշագրի տեքստը

Ուկրաինայի Նախարարների կաբինետը հրապարակել է հազվագյուտ հողային մետաղների վերաբերյալ ԱՄՆ-ի հետ համաձայնագիր ստորագրելու իշխանությունների մտադրության մասին հուշագրի տեքստը։ Փաստաթուղթը հրապարակվել է երկրի կառավարական պորտալում։

«Ուկրաինան և Միացյալ Նահանգները հուշագիր են ստորագրել, որով հաստատում են իրենց համատեղ կառուցողական աշխատանքը տնտեսական գործընկերության համաձայնագրի շուրջ և հաստատում են նրանց մտադրությունը՝ կնքելու գործարք, որը ձեռնտու կլինի երկու ժողովուրդներին»,- ասվում է կից հայտարարության մեջ։

Միաժամանակ, հուշագրում ինքնին նշվում է, որ Վաշինգտոնն ու Կիևը ծրագրում են համատեղ ներդրումային հիմնադրամ ստեղծել։ Դրանից ստացված միջոցները կուղղվեն Ուկրաինայի վերականգնման ֆինանսավորմանը։

Ինչպես նշվում է փաստաթղթում, վերջին երեք տարիների ընթացքում ամերիկյան ղեկավարությունը Կիևին տրամադրել է «նյութական նշանակալի աջակցություն»։ Տեքստում ընդգծվում է նաև, որ երկու կողմերն էլ ձգտում են վերջ տալ ռազմական գործողություններին և հաստատել կայուն խաղաղություն։