Նոր Հանրային խորհուրդը հնացավ լույսի արագությամբ. քաղաքական վերլուծաբան

«Նոր Հանրային խորհուրդը հնացավ լույսի արագությամբ»։

Իր այս համոզմունքը քաղաքական վերլուծաբան Հակոբ Բադալյանն այսպես է հիմնավորում.

«Առնվազն երկու աղմկահարույց առիթ, որը պետք է արժանանար այդ կառույցի արագ արձագանքին: Մեկը զինծառայության մասին օրենքի նախագիծը, մյուսը՝ Փաշինյանի նախաձեռնած աղմուկը ՀԱԵ հետ դիմակայության համատեքստում, հատկապես փաշինյանական գրառումների ոճը՝ որպես երկրի բարձրագույն պետական պաշտոնյայի համար անընդունելի խոսույթ:

Սակայն, Հանրային խորհրդից ոչ մի արձագանք: Հետո իհարկե գուցե կլինի, բայց կառույցների կենսունակության կարեւոր հավաստիքը դրանց արագ արձագանքի կարողությունն է, առնվազն հաշվի առնելով այն պարզ հանգամանքը, որ չափազանց արագ է ընթանում ժամանակը:

Ընդ որում, արագ եւ իհարկե համարժեք արձագանք, որովհետեւ նաեւ այդ համադրված կարողությունն է, որ պետք է լինի Հանրային խորհուրդ համարվելու արժանիք, եթե իհարկե դա չի դիտվում պարզապես սնապարծության կամ իշխանությանը հնարավորինս մերձ գտնվելու հնարավորություն:

Բայց, ինչպես նշել եմ այդ խորհրդի նոր կազմի մասին տեղեկատվությունից հետո, Հայաստանում, ուր կա ներքաղաքական կյանքի այդ աստիճան բեվեռացվածություն, չի կարող իսկապես հանրային շահի ամբողջական արտահայտմամբ զբաղվել մի խորհուրդ, որը ձեւավորվում է իշխանության կամքով: Առկա առիթները պարզապես հաստատել են այդ գնահատականս»։