Իրականում Նիկոլը, «մարդիկ» ասելով, թերևս նկատի ունի ՔՊ վերնախավին ու իրեն սպասարկող մանկլավիկներին. Արմեն Հովասափյան

Արմեն Հովասափյանը գրում է. «Նիկոլն այսօր գնացել է ԱԺ՝ բյուջեի կատարման հաշվետվություն ներկայացնելու. ինչպես և սպասելի էր, նա այդ ամենը վերածվեց ինքնագովազդի հերթական շոուի։ Ուշադի՛ր. անամոթաբար տեսախցիկների առաջ հպարտորեն հայտարարում է, թե ունենք «ռեկորդային» հավաքագրումներ, «կրկնակի» աշխատավարձեր, «աննախադեպ» թվեր, ու վերջում էլ ավելացնում՝ «մարդկանց կյանքը 2018-ից հետո զգալիորեն լավացել է։»

Լսում ես ու անկախ քեզանից մտածում՝ ո՞ւմ մասին է խոսում, ի՞նչ մարդիկ են նրանք, ում կյանքը լավացել է։ Օրինակ արդյոք խոսքը Ներքին Հանդում, Խոզնավարում Վարդենիսում կամ Ջերմուկում, թե՞ սահմանին ապրող այն բնակիչներն են, ում անվտանգությունից պետականությունն այլևս ձեռք է քաշել , և մարդիկ ամեն օր ապրում են վախը սրտներում։ Հե՞շտ է ապրել այնտեղ, որտեղ չգիտես՝ վաղը առավոտյան արթնանալու ես, թե՝ ոչ։

Իրականում Նիկոլը, «մարդիկ» ասելով, թերևս նկատի ունի ՔՊ վերնախավին ու իրեն սպասարկող մանկլավիկներին։ Դրանց կյանքը, այո, իրականից փոխվել է՝ բյուջեից ստացած հսկայական աշխատավարձերով, թիկնապահներով, թանկարժեք ավտոմեքենաներով, զրոյացված ապառիկներով ու փաբերի պարտքերից պրծելով։ Մինչդեռ մարդիկ՝ այս երկրի իրական քաղաքացիները, շարունակում են ապրել սոցիալական ճնշումների, անարդարության, հուսահատության ու անվտանգություն չունենալու վիճակում։ Նիկոլը նրանց մասին չի խոսում, որովհետև նրա համար միակ կարևոր չափորոշիչը փողն ու ուտելիքն է։ Նա հավատում է բացառապես մամոնային:

Իսկ «գետնի վրա» իրականությունը լրիվ այլ է. Արցախը՝ հանձնված, 150 հազար մարդ՝ տեղահանված, հարյուրավոր եկեղեցիներ՝ լքված, գերեզմաններ՝ անտեր մնացած։ Բայց այդ ամենը Նիկոլի «լավ ապրելու» պատկերացումների մեջ տեղ չունի, որովհետև նրա պատկերացմամբ «լավ ապրելը» մենակ իրեն ու իր շրջապատին է վերաբերում։ Նա չի ստում, երբ ասում է՝ «մարդիկ ավելի լավ են ապրում», պարզապես դու այնտեղ չկաս»։