19-ամյա երիտասարդը հայտնվել է փակված խցում՝ հանուն TikTok-ի

Նյու Յորքի նահանգում 19-ամյա երիտասարդը ներթափանցել է լքված խիստ ռեժիմով բանտի տարածք՝ սոցիալական ցանցերի համար տեսանյութ նկարահանելու նպատակով, սակայն հանկարծակիով մնացել է փակված բանտախցում։ Ըստ Corrections 1-ի՝ դեպքը տեղի է ունեցել հունիսի 13-ին՝ Downstate Correctional Facility-ի տարածքում։

Երիտասարդը ստիպված է եղել կանչել ոստիկանություն ու հրշեջներ, որոնք նրան ազատել են արդեն կեսգիշերին՝ հունիսի 14-ին։ Հետագայում նա ձերբակալվել է՝ արգելված տարածք ապօրինի մուտք գործելու մեղադրանքով։ Նրան սպառնում է տուգանք։

Նշենք, որ սա առաջին նման դեպքը չէ․ բանտը փակվել է 2022 թվականին, և այնտեղ հաճախ են փորձում ներխուժել «ստալքերները»։ Մինչդեռ իշխանությունները ծրագրում են տարածքում կառուցել բնակելի թաղամաս՝ 1300 բնակարանով ու զբոսանքի գոտիներով։ Ինցիդենտներից հետո շինաշխատանքների տեմպը հնարավոր է՝ արագացվի։