Իրանը զգում է հայ ժողովրդի հոգևոր աջակցությունը. դեսպանը շնորհակալություն հայտնեց ՀՀ կառավարությանը (տեսանյութ)

Պատերազմը Իսրայելի համար գործիք չէ, այլ նպատակ: Սիոնիստական ռեժիմը դիվանագիտության թշնամին է և ապակայունացնող հիմնական գործոնը տարածաշրջանում: Այս մասին այսօր՝ հունիսի 17-ին, հրավիրված մամուլի ասուլիսի ընթացքում հայտարարեց Հայաստանում Իրանի Իսլամական Հանրապետության արտակարգ և լիազոր դեսպան Մեհդի Սոբհանին՝ ներկայացնելով հունիսի 13-ին Իսրայելի կողմից սկսված ռազմական ագրեսիայի հետևանքով ստեղծված իրավիճակը Իրանում:

«2025 թ. հունիսի 13-ի վաղ առավոտյան Իրանի Իսլամական Հանրապետությունը ենթարկվեց սիոնիստական ռեժիմի անօրինական զինված հարձակման: Այս ագրեսիայի ժամանակ սիոնիստական ռեժիմը հարձակվեց բնակելի շենքերի, պաշտպանական ենթակառուցվածքների և Նաթանզի միջուկային օբյեկտի վրա՝ պատճառելով վնասներ: Նահատակվեցին զինված ուժերի մի շարք բարձրաստիճան հրամանատարներ, գիտնականներ, դասախոսներ և շարքային քաղաքացիներ, կանայք և երեխաներ: Հաջորդիվ ռեժիմն ընդլայնեց իր ագրեսիայի շրջանակը՝ հարձակվելով մի շարք տնտեսական և հանրային ենթակառուցվածքների վրա, ինչպիսիք են նավթավերամշակման գործարանները և նավթամթերքի փոխադրման և բաշխման կենտրոնները, հիվանդանոցներ, և երեկ էլ հարձակվեց պետական հեռուստաընկերության վրա», - հաղորդեց դեսպանը:

 

Դիվանագետը շեշտեց, որ այս իրավիճակում Իրանն օգտվել է ինքնապաշտպանության իր օրինական իրավունքից՝ ձեռնարկելով և իրականացնելով մի շարք միջոցառումներ, այդ թվում՝ հրթիռային պատասխան հարվածներ հասցնելով Իսրայելի ռազմաբազաներին և տնտեսական օբյեկտներին՝ ի պատասխան «սիոնիստական ռեժիմի» կողմից Իրանի ենթակառուցվածքների վրա հարձակման:

Դեսպանի խոսքով՝ Իսրայելի ագրեսիան վերջին 80 տարիներին «սիոնիստական ռեժիմի» կողմից իրականացված օրենքների խախտման շարունակությունն է, և «սիոնիստական ռեժիմը» եղել է միջազգային իրավունքի և նորմերի, ինչպես նաև՝ ՄԱԿ-ի կանոնադրության, այդ թվում՝ մարդասիրական իրավունքի և մարդու իրավունքների ամենամեծ խախտողը:

 

«Սիոնիստական ռեժիմի կողմից Իրանի դեմ իրականացված անօրինական զինված հարձակումը հարձակում է ամբողջ ՄԱԿ-ի համակարգի վրա և լուրջ սպառնալիք միջազգային խաղաղությանն ու անվտանգությանը, և ՄԱԿ-ի Անվտանգության խորհուրդը պարտավոր է միջամտել այս հարցում ագրեսիան դադարեցնելու նպատակով», - ընդգծեց Իրանի դեսպանը:

Մեհդի Սոբհանիի խոսքով՝ Իրանը մինչ օրս երբեք որևէ պատերազմ չի սկսել, և վերջին տասնամյակներին մշտապես եղել է ագրեսիայի զոհ: Իսկ Իսրայելը, ինչպես նշեց Իրանի Իսլամական Հանրապետության դեսպանը, միտունավոր կերպով ընդլայնում է իր ագրեսիայի շրջանակը տարածաշրջանում: 

 

«Այս ռեժիմի գոյությունը միահյուսված է պատերազմի, ագրեսիայի, հարևանների վրա հարձակումների, լարվածության, ճգնաժամի և անկայունության սրման հետ, և նա իր գոյությունը տեսնում է պատերազմի մեջ: Պատերազմը այս ռեժիմի համար գործիք չէ, այլ նպատակ: Այս ռեժիմը դիվանագիտության թշնամին է և Մերձավոր Արևելքում ապակայունացման հիմնական գործոնը », - հավելեց Մեհդի Սոբհանին:

Դեսպանը նաև նշեց, որ հիմնավոր փաստերի հիմնվելով՝ Իրանը Միացյալ Նահանգների համարում է այդ ագրեսիայի մասնակից և կտրականապես Վաշինգտոնի՝ երկխոսության և դիվանագիտության մասին պնդումները, որոնք հիմնված են հովանավորչական հայտարարությունների և Միացյալ Նահանգների կողմից «սիոնիստական ռեժիմին» տրամադրվող ամեն տեսակի՝ քաղաքական, ռազմական, տեխնիկական և հետախուզական աջակցության վրա:

 

«Մենք չէինք ուզում այս պատերազմը և զբաղվում էինք մեր միջուկային ծրագրի վերաբերյալ դիվանագիտությամբ, բայց այս ագրեսիան մեզ պարտադրվեց: Մենք այժմ պատասխանատու ենք համարում ԱՄՆ կառավարությանը Իսրայելին Իրանի դեմ կատարված հանցագործություններում ցուցաբերված լիակատար աջակցության համար: Մեր կարծիքով՝ ԱՄՆ-ը այս հարձակումների մասնակից է և պետք է ընդունի իր պատասխանատվությունը և դադարեցնի երեսպաշտությունն ու միջազգային հանրության մոլորեցումը: Ուժի կիրառմամբ համաձայնությունը համաձայնություն չէ, դա հանձնվել է: Մենք չե՛նք հանձնվի», - ընդգծեց Իրանի դեսպանը:

Մեհդի Սոբհանիի խոսքով՝ ճշմարտությունը հնարավոր չէ լռեցնել ռմբակոծություններով: Դեսպանը նաև հավելեց, որ Իրանը չի ձգտում պատերազմի սրացման, բայց պատրաստ է ցանկացած սցենարի:

 

«Մենք չենք ցանկանում, որ այս պատերազմը տարածվի այլ երկրներում կամ տարածաշրջանում, եթե այն մեզ չպարտադրվի: Իրանի Իսլամական Հանրապետությունը տարածաշրջանում կպահպանի իր հռչակած «կարմիր գծերը» և չի շեղվի դրանցից: Փորձվածը փորձելը սխալ է», - նշեց Սոբհանին:

 

Դեսպանի ներկայացրած տվյալներով՝ Իսրայելի ագրեսիայի հետևանքով նահատակվել է 224 իրանցի, վիրավորվել 1200-ը: Նրանց 90 տոկոսը շարքային քաղաքացիներ են՝ խաղաղ բնակիչներ:

 

Իր ելույթի վերջում Իրանի Իսլամական Հանրապետության դեսպանը շնորհակալություն հայտնեց Հայաստանի Հանրապետության կառավարությանը՝ Իսրայելի ագրեսիան դատապարտելու վճռական դիրքորոշման և Հայաստանի ազնիվ ժողովրդի զորակցության ու աջակցության համար:

 

«Մենք զգում ենք հայ ժողովրդի հոգևոր աջակցությունը: Կեցցե՛ Հայաստանը, կեցցե՛ Իրանը», - եզրափակեց դեսպան Մեհդի Սոբհանին:

 

Արամ Սարգսյան