ԵՄ-ը Հայաստանի կողքին է՝ նրա ջանքերին աջակցելու համար․ Կալաս

Եվրամիության արտաքին գործերի եւ անվտանգության քաղաքականության բարձր ներկայացուցիչ, Եվրոպական հանձնաժողովի փոխնախագահ Կայա Կալասն ասել է, որ Հայաստան է ժամանել հստակ ուղերձով։

ԵՄ-ը երբեք այսքան մոտ չի եղել Հայաստանին, ասել է Կալասը։

Վերջին տարիների բարեփոխումների հաջողությունը նշելով՝ ԵՄ ներկայացուցիչը վստահեցրել է, որ պատրաստ է խորացնել համագործակցությունը տարբեր ոլորտներում։ Որպես ֆինանսական օգնություն՝ նա նշել է 2024-27թթ. բիզնես օգնության ծրագիրը՝ 270 մլն եվրոյի չափով, տեղահանված անձանց սոցիալական օգնության օգնությունը (Կալասը չի նշել, թե որտեղ եւ ինչ պատճառով են տեղահանվել անձինք)։

ԵՄ գերագույն ներկայացուցիչը նշել է մարդկանց միջեւ շփումների, վիզային ռեժիմի ազատականացման շուրջ երկխոսության զարգացման կարեւորությունը։ Կալասը նշել է ԵՄ գործունեությունը խաղաղության եւ կայունության խթանման ուղղությամբ, որի հետ կապված ընդգծել է «ԵՄ առաքելության կարեւոր դերը»։ «Երեկ ես այցելեցի եւ ծանոթացա առաքելության աշխատանքին»,- ասել է Կալասը։

Նա նաեւ հայտնել է, որ այսօր ստորագրվել է ճգնաժամերի կառավարման վերաբերյալ շրջանակային համաձայնագիր, որը թույլ է տալիս Հայաստանին մասնակցել ԵՄ առաքելություններին ամբողջ աշխարհում: Եվս մեկ անգամ ընդգծելով Հայաստանում ժողովրդավարության խթանման անհրաժեշտությունը՝ Կալասը վստահեցրել է, որ «ԵՄ-ը Հայաստանի կողքին է՝ նրա ջանքերին աջակցելու համար»: