Իրանական նավթի արտահանումը նվազել է 40%-ով

Անցած տարվա 9 ամիսների ընթացքում իրանական նավթի արտահանումը միջազգային պատժամիջոցների գործադրման արդյունքում նվազել է 40%-ով, երկուշաբթի օրը հայտնել է Agence France-Presse-ը՝ վկայակոչելով իրանական ԶԼՄ-ները:

Կիրակի օրը Իրանի նավթի նախարար Ռուստամ Քասեմին մեջլիսի պաատգամավորների առջև ելույթ է ունեցել իր գերատեսչության դրության մասին զեկույցով: Համաձայն այդ զեկույցի՝ 2012թ. մարտ ամսից նավթի վաճառքի ծավալները նվազել են 40%-ով, իսկ նրանից ստացվող եկամուտները պակասել են 45%-ով, հայտնում է իրանական ISNA գործակալությունը:

Եվրամիության երկրները 2012թ. հուլիսի 1-ից արգելք էին դրել իրանական նավթի արտահանման վրա: ԵՄ երկրներն իրենց արարքը մեկնաբանում են նրանով, որ փորձում են այդ կերպ զսպել Իրանի միջուկային նկրտումները: ԱՄՆ-ը, Իսրայելն ու Արևմուտքի մի քանի երկրներ մեղադրում են Իրանին միջուկային զենք մշակելու մեջ: Իրանն իր հերթին հերքում է այդ մեղադրանքները՝ հայտարարելով, որ միջուկային զարգացման իր ծրագրերը բացառապես խաղաղ նպատակներ են հետապնդում՝ ապահովելու իր երկրի բնակչության էլեկտրաէներգիայի պաշարները: