Ռուսական բանակը մոտենում է Սումիին՝ վերահսկելով ռազմավարական ճանապարհները

Ռուսաստանի ԶՈւ-ն գտնվում է Ուկրաինայի Սումի քաղաքի մերձակայքում և արդեն վերահսկում է Սումի-Կիև մայրուղին։ Այս մասին «Лента.ру»-ին տված հարցազրույցում ասել է պահեստի գնդապետ, ռազմական փորձագետ Անատոլի Մատվիչուկը։ Նրա խոսքով՝ ռուսական ուժերը կատարում են հատուկ գործողություններ ուկրաինական ուժերի թիկունքում՝ նրանց նյութատեխնիկական մատակարարումները խափանելու համար։

Մատվիչուկը նշել է, որ Ուկրաինայի զինված ուժերը Սումիի շրջանում կենտրոնացրել են բոլոր հնարավոր ռեսուրսները՝ փորձելով հակագրոհներով վերականգնել կորցրած դիրքերը, սակայն բավարար հրետանային և օդային աջակցություն չունեն։ «Մենք գտնվում ենք Սումիի մատույցներում, կարելի է ասել՝ բինոկլով արդեն երևում է քաղաքը»,– ընդգծել է փորձագետը։

Ավելի վաղ հաղորդվել էր, որ ռուսական ուժերի համակցված հարվածների հետևանքով Ալեքսեևկա և Անդրեևկա գյուղերում տեղակայված ուկրաինական հարձակողական խմբերի մինչև 70%-ը ոչնչացվել է։ Բացի այդ, ռուսական կողմը սպառնալիք է ստեղծում նաև Չեռնիգովի ուղղությամբ։