11–ամյա աշակերտը հոսպիտալացվել է տնային աշխատանքի պատճառով

South China Morning Post-ի փոխանցմամբ՝ Չինաստանի Հունան նահանգից Լյանլյան անունով 11-ամյա դպրոցականը հոսպիտալացվել է մի քանի ժամ տևողությամբ տնային աշխատանքներ կատարելուց հետո։

Երիտասարդ աշակերտը ցանկացել է ամառային արձակուրդի բոլոր առաջադրանքները կատարել մեկ օրում։ 11-ամյա Լյանլյանը 14 ժամ է անցկացրել սովորելով՝ առավոտյան 8-ից մինչև երեկոյան 10-ը։

Հաղորդվում է, որ տղան ծնողներին բողոքել է շնչառության դժվարությունից, գլխապտույտից, գլխացավերից և ձեռքերի թմրությունից։

Ժամը 23:00-ին տագնապալի ախտանիշները վատթարացել են, և ծնողները տղային տարել են հիվանդանոց։ Բժիշկները տղայի մոտ ախտորոշել են շնչառական ալկալոզ՝ վիճակ, որն առաջանում է հուզական գրգռվածության և սթրեսի պատճառով առաջացած հիպերվենտիլյացիայից։

Բժիշկների խոսքով՝ այս վիճակը ի հայտ է գալիս չափազանց խորը և արագ շնչառության ժամանակ և կարող է առաջացնել կրծքավանդակի լարվածություն, շնչառության դժվարացում, սրտի արագացած բաբախյուն և թմրություն։

Չանշայի կենտրոնական հիվանդանոցը հայտնել է, որ միայն օգոստոսին նմանատիպ ախտանիշներով ավելի քան 30 դեռահաս է ընդունվել իրենց մանկական շտապ օգնության բաժանմունք։ Այս թիվը տասն անգամ ավելի է, քան մյուս ամիսներին։