Անահիտ Ավանեսյանը առաջնահերթ է համարել ԱԱՊ օղակում ընտանեկան բժշկության ինստիտուտի ներդրման շարունակականությունը

Հասարակություն 25 Սեպտեմբեր, 2025 14:08

Առողջապահության նախարար Անահիտ Ավանեսյանն աշխատանքային այցով Նյու Յորքում է` մասնակցելու ՄԱԿ-ի Գլխավոր վեհաժողովի 80-րդ նստաշրջանին: Այդ մասին հայտնում են ՀՀ առողջապահության նախարարությունից:

Նստաշրջանի շրջանակում նախարարը ելույթ է ունեցել Ղազախստանի կազմակերպած «Առողջապահության առաջնային օղակի ներդրման քաղաքականությունը. Քաղաքականության հիմնական փոփոխություններ» հարակից միջոցառմանը:

Անդրադարձել է`

ԱԱՊ օղակի զարգացմանն ուղղված բարեփոխումների միջոցառումներով նախատեսված է բժշկական կազմակերպությունների շենքային պայմանների բարելավում` 20 ամբուլատորիայի և 10 պոլիկլինիկաների կառուցում, վերանորոգում.
Լիցենզավորման պահանջների և պայմանների վերանայում ԱԱՊ կազմակերպությունների կառուցվածքա-կազմակերպչական ձևերի փոփոխություն.
ԱԱՊ կազմակերպություններում ծառայությունների մատուցման մոդելի վերանայում և ծառայությունների ծավալի ընդլայնում.
ԱԱՊ օղակում դեղորայքային ապահովման մոդելի և ծավալի վերանայում` մասնավորապես, քրոնիկ հիվանդություններ ունեցող բոլոր պացիենտների համար դեղերի ապահովում.
Մատուցվող բուժօգնության որակի չափանիշների վերանայում, կադրային ներուժի համալրում, հեռաբժշկության հնարավորությունների զարգացում, մոբիլ ծառայության ներդրում.
սքրինինգային ծրագրերի ավելացում:

Իր ելույթում Անահիտ Ավանեսյանը իրականացվող միջոցառումների շրջանակներում առաջնահերթ է համարել ԱԱՊ օղակում ընտանեկան բժշկության ինստիտուտի ներդրման շարունակականությունը և բարելավմանն ուղղված միջոցառումների գերակայությունը՝ ՀՀ ամբողջ տարածքում, անկախ ԱԱՊ բժշկական կազմակերպությունների սեփականության ձևից և պատկանելությունից:

Այդ առումով արդեն իսկ վերանայվել են ընտանեկան բժշկի և ընտանեկան բուժքույրերի կրթական ծրագրերը, Առողջապահության նախարարի հրամանով հաստատվել է ընտանեկան բժիշկների մասնագիտական բնութագիրը և գործառույթները: Ավելացել է նպատակային ծրագրերի շրջանակներում «ընտանեկան բժշկություն» մասնագիտացման համար հատկացվող տեղերը՝ 2025 թ. հատկացվել է 14 տեղ: