Ճապոնական հայտնի ուտեստը մեծացրել է տղամարդկանց մոտ վաղաժամ մահվան ռիսկը

Ճապոնական ռամենի՝ արգանակով պատրաստված արիշտայի հաճախակի օգտագործումը մեծացնում է տղամարդկանց մոտ վաղաժամ մահվան ռիսկը, ըստ Յոնեզավայի սննդի գիտությունների համալսարանի (Ճապոնիա) հետազոտողների կողմից անցկացված ուսումնասիրության: Արդյունքները հրապարակվել են «Սննդի, առողջության և ծերացման հանդես» (JNHA) ամսագրում:

Ուսումնասիրությանը մասնակցել է 40 տարեկանից բարձր ավելի քան 6700 մարդ: Մասնակիցները բաժանվել են խմբերի՝ կախված նրանից, թե որքան հաճախ են նրանք օգտագործում ուտեստը՝ ամսական մեկ անգամից պակասից մինչև շաբաթական երեք կամ ավելի անգամ:

Վերլուծությունը ցույց է տվել, որ ռամենի սիրահարները ավելի հակված են եղել ավելորդ քաշի, ծխելու, ալկոհոլ օգտագործելու և առողջական խնդիրների, ինչպիսիք են շաքարախտը և հիպերտոնիան, առկայության: Շաբաթական երեք անգամ ռամեն ուտող մասնակիցները վաղաժամ մահվան ավելի բարձր ռիսկ ունեին:

Մահվան ռիսկը հատկապես բարձր էր 70 տարեկանից բարձր տղամարդկանց և նրանց մոտ, ովքեր պարբերաբար ռամեն էին ուտում՝ արգանակն ավարտելով: Հետազոտողները նշել են, որ արգանակում է մնում աղի և ճարպի բարձր կոնցենտրացիան: Այս նյութերի ավելցուկը սննդակարգում բարձրացնում է արյան ճնշումը և առաջացնում քաշի ավելացում՝ մեծացնելով սրտանոթային համակարգի վրա բեռը:

Հեղինակները շեշտել են, որ ուսումնասիրությունը դիտողական է և չի ապացուցում ուղղակի պատճառահետևանքային կապը: Այնուամենայնիվ, արդյունքները ենթադրում են, որ ռամենի կանոնավոր օգտագործումը կարող է առողջության ռիսկի գործոն լինել, հատկապես միջին տարիքի տղամարդկանց մոտ:

Թարգմանությունը՝ Lurer.com-ի