Որևէ մեկնարկած բարեփոխում չի կանգնեցվելու․ փոխնախարարը՝ ՊՆ բյուջեի կրճատման մասին

Բոլոր բարեփոխումներն իրենց ընթացքը շարունակելու են։ Այս մասին լրագրողների հետ զրույցում ասաց ՀՀ պաշտպանության փոխնախարար Արման Սարգսյանը։

Անդրադառնալով 2026-ի բյուջեում պաշտպանական ծախսերի կրճատմանը՝ նա ասաց, թե վարչապետ Նիկոլ Փաշինյանն ԱԺ ամբիոնից, իր խոսքով, արդեն «հանգամանալից բացատրել է» դա։

«Բայց ամենից կարևորը, որ որևէ մեկնարկած բարեփոխում չի կանգնեցվելու և հասնելու է իր տրամաբանական ավարտին»,– նշեց Սարգսյանը։

Հիշեցնենք՝ Կառավարությունը սեպտեմբերի 25–ի իր կառավարության նիստում հավանություն տվեց 2026 թվականի պետական բյուջեի նախագծին։

Փաստաթղթից տեղեկանում ենք, որ հաջորդ տարվա բյուջեում պաշտպանական ծախսերը նվազել են։ Եթե այս տարի պաշտպանական ծախսերի համար հատկացվել է 664.6 մլրդ դրամ, ապա 2026–ին այդ գումարը կկազմի 563․1 մլրդ դրամ։

Նվազումը կազմում է 101.5 մլրդ դրամ։

Հիշեցնենք, որ ավելի վաղ վարչապետ Նիկոլ Փաշինյանը հայտարարել էր, որ հնարավոր է՝ 2026 թվականի բյուջեում ծախսերի Էական աճ կամ պաշտպանական ծախսերի աճ ընդհանրապես չլինի։