Դոբերմանը փրկել է տիրոջը արջի հարձակումից

Կանադայում դոբերման շան՝ Նայթի հերոսական քայլը փրկել է իր տիրոջը՝ 70-ամյա Կրեյգ Քեմփբելին, արջի հարձակումից։ Կերարտադրող Purina ընկերությունը Նայթին ներառել է կենդանիների 2025 թվականի փառքի սրահում, հայտնում է CTV News-ը։

Դեպքը տեղի է ունեցել 2024-ի մայիսին՝ Ալբերտա նահանգի Կոկրեյն քաղաքի մոտակայքում։ Քեմփբելը և Նայթը անտառում հանդիպել են արջ մորը և նրա երկու ձագերին։ Երբ արջը հարձակվել է տղամարդու վրա, Նայթը ցատկել է նրանց միջև և կանգնեցրել գիշատչին՝ թույլ տալով տիրոջը ժամանակին օգտագործել արջերի դեմ նախատեսված սպրեյը։

Քեմփբելը պատմել է, որ Նայթին ձեռք է բերել ոստիկանության շների պատրաստման ծրագրից, և նա միշտ էլ աչքի է ընկել համարձակությամբ։ «Շատ շներ կփախչեին արջից, բայց իմը հակառակը՝ վազեց նրա վրա։ Նա իսկապես քաջարի շուն է», — ասել է Քեմփբելը։

Purina-ի փառքի սրահը գործում է 1968 թվականից և ներառում է առավել քաջ կենդանիներին։ Նայթը դարձել է 2025-ի նոր անդամներից մեկը՝ միանալով 168 շների, 27 կատուների և մեկ ձիու։