Սաուդյան Արաբիայի հիմնադրամը և Քուշների ընկերությունը ցանկանում են գնել FIFA-ի և Sims-ի ստեղծող EA-ն

The Wall Street Journal-ի տեղեկություններով՝ Սաուդյան Արաբիայի պետական ներդրումային հիմնադրամը (PIF) և ԱՄՆ նախկին նախագահի փեսա Ջարեդ Քուշների Affinity Partners ներդրումային ընկերությունը պատրաստվում են գնել համակարգչային խաղերի խոշորագույն ստեղծող Electronic Arts-ը։

Աղբյուրների տվյալներով՝ գործարքը, որը գնահատվում է մոտ 50 միլիարդ դոլար, կարող է հայտարարվել արդեն հաջորդ շաբաթ։ Եթե այն կայանա, կդառնա պատմության ամենախոշոր լիվերիջ-բայաութը՝ վարկային միջոցներով ընկերության բաժնետոմսերի գնման ձևաչափով։

EA-ն հայտնի է իր սպորտային հիթերով՝ FIFA ֆուտբոլային սիմուլյատորներով և The Sims խաղերի շարքով։ Ընկերության հնարավոր վաճառքը տեղի է ունենում այն շրջանում, երբ նման խոշոր գործարքները զգալիորեն կրճատվել էին 2008-ի ֆինանսական ճգնաժամից հետո։