«Շատ չար սկյուռը» վախի մեջ է պահում ամերիկյան քաղաքը. հինգ մարդ հոսպիտալացվել է (տեսանյութ)

ԱՄՆ Կալիֆորնիա նահանգի Սան Ռաֆայել քաղաքի բնակիչներին մտահոգել են ագրեսիվ սկյուռի կողմից հաճախակի հարձակումները։ ABC News-ի փոխանցմամբ՝ հարձակման հետևանքով մի քանի մարդ լուրջ վնասվածքներ է ստացել և տեղափոխվել շտապօգնության բաժանմունք։

Քաղաքի բնակիչ Ջոան Հեբլեքը պատմել է, որ զբոսանքի ժամանակ սկյուռը հանկարծակի հարձակվել է իր վրա և կծել ոտքից, ինչից հետո ստիպված է եղել դիմել բժիշկների օգնությանը։

Մի քանի օր անց նույն հատվածում վնասվածքներ են ստացել Իզաբել Քամփոյը և նրա զարմուհին՝ Կարմենը։

«Սկյուռը փորձեց ցատկել դեմքիս, բայց պաշտպանվեցի, բայց նա կծեց ձեռքիցս։ Ամբողջությամբ արյունով էի պատվել։ Ստիպված էի շտապօգնության բաժանմունք գնալ», - պատմել է նա։

Տեղի բնակիչների խոսքով՝ սկյուռի զոհ է դարձել մոտ հինգ մարդ։ 

«WildCare» կազմակերպության փորձագետ Վանեսա Փոթերը բացատրել է, որ սկյուռները կատաղություն չեն տարածում։ Կենդանու ագրեսիվ վարքագիծը, հավանաբար, պայմանավորված է նրանով, որ նրան ձագուկ ժամանակ կերակրել են մարդիկ։

«Երբ սկյուռիկները մարդկանց կապում են սննդի հետ, նրանք կորցնում են իրենց վախը։ Եթե սնունդ չկա, կենդանին կարող է հիասթափվել և պաշտպանել իր տարածքը», - նշել է նա։

Հաղորդվում է, որ տարածքում արդեն տեղադրվել են նախազգուշացնող թռուցիկներ, բայց վերջին մի քանի օրերին սկյուռը չի երևացել։