Միքայել Սրբազանի գործը քաղաքականհաշվեհարդար է՝ ուղղված ընդդեմԵկեղեցու, իշխանությունը վախեր ունի. Մհեր Մելքոնյան

ՀՀ պետականության հիմքերը պետք է հենվեն ոչ միայն օրենքի տառի, այլ էլ պետական մտածողության, ինստիտուցիոնալ արժանապատվության և բարոյական կայունության վրա։ Այսօր ցավոք մենք ականատես ենք մի գործընթացի, որը խախտում է այս հավասարակշռությունը։ Այս մասին, այսօր՝ սեպտեմբերի 30–ին, ԱԺ–ում հայտարարությունների ժամին իր ելույթում նշեց «Հայաստան» խմբակցության պատգամավոր Մհեր Մելքոնյանը։

«Խոսքը վերաբերում է Շիրակի թեմի առաջնորդ գերաշնորհ Միքայել արքեպիսկոպոս Աջապայանի շուրջ ծավալվող իրադարձություններին, որոնք չեն կարող մեկնաբանվել միայն իրավական տեսակետից։ Որքան էլ փորձ արվի դրանք ներկայացնել, որպես օրինական ընթացակարգ, հասարակական ընկալումն այսօր այլ է, և այդ ընկալումը վստահ եմ, բոլորիս համար հասկանալի է, մենք գործ ունենք հստակ քաղաքական պատվերի կատարման հետ, որը չի կարելի անտեսել կամ թաքցնել, իբր օրինականության շրջանակներում իրականացվող գործընթացների հետևում։

Սա պարզապես անհատական հետապնդում չէ, սա քաղաքական հաշվեհարդար է, ուղղված ընդդեմ անկախ կարծիքի, ընդդեմ խղճի ազատության, ընդդեմ եկեղեցու ինքնիշխան դիրքորոշման, և սա պետք է հստակ արձանագրվի այս ամբիոնից որպես քաղաքական գնահատական»,–ասաց նա։

պատգամավորը նկատեց, որ Հայաստանյաց առաքելական սուրբ եկեղեցին, որպես ազգային հաստատություն միշտ եղել է պետության գործընկեր, բայց երբեք իշխանության սպասարկու։

«Եվ երբ եկեղեցու առաջնորդը իր անհատական կամ հովվական խոսքում արտահայտում է այնպիսի դիրքորոշում, որը կարող է տարբերվել գործող իշխանության պատկերացումներից, դա ոչ թե հանցագործություն է, այլ ժողովրդավարության առումով առողջ դրսևորում։ Իսկ երբ նման խոսքի հետևանքով գործի են դրվում ճնշման մեխանիզմները, երբ փորձ է արվում խաթարել հոգևորականի հեղինակությունը ու ծառայությունը, սա արդեն լուրջ սպառնալիք է, թե՛ հասարակական ներդաշնակության, թե՛ պետության իրավական համակարգի համար։

Պետությունն ունի սահմաններ, այդ սահմաններից մեկն էլ հոգևոր կառույցների անկախությունն է, մյուսը խոսքի ազատությունը։ Եվ ամենակարևորը պետության բարոյական ինքնակառավորումը, որն էական է իշխանության լեգիտիմության համար։ Այս տեսակետից ստեղծված իրավիճակը վտանգավոր նախադեպ է, որովհետև վաղը այս գործելաոճը կարող է ուղղվել ոչ միայն հոգևոր, այլ ակադեմիական, լրագրողական, մանկավարժական համայնքի դեմ։

Եվ այդ օրը մենք բոլորս կշարունակենք լռել, թե այսօր կձև, թե այսօր կձևավորենք քաղաքական կանգ կանգնեցնելու այս հակաօրինական գործընթացը։

Ես կոչ եմ անում դադարեցնել քաղաքական դրդապատճառներով պայմանավորված ճնշումները սրբազանների նկատմամբ, ապահովել լիարժեք թափանցիկություն և իրավական պրոցեսների քաղաքական չեզոքություն։ Դատապարտում եմ եկեղեցու նկատմամբ կիրառվող քաղաքական բռնաճնշումները, և ի վերջո պետք է վերականգնել հասարակության վստահությունը պետական ինստիտուտների նկատմամբ, պետությունը ուժեղ է, երբ կարողանում է հանդուրժել կարծիքը և երբ չի շփոթում դիրքորոշումը ապակայունացման հետ։

Իշխանությունը եթե ցանկանում է լինել ժողովրդավար, պետք է կարողանա հաղթահարել իր ներսում ձևավորվող վախերը այլախոհության նկատմամբ, հակառակ դեպքում մենք կընկնենք ավտորիտար ռեժիմի հորձանուտի մեջ, որից դուրս գալը հետագայում կարող է լինել ոչ միայն դժվար, այլ ցավոտ։

Երեկ դատախազ Արման Բաղդասարյանը պահանջեց երկու տարի վեց ամիս ազատազրկում Շիրակի թեմի առաջնորդ Միքայել արքեպիսկոպոս Աջապահյանի համար, Պետք է հիշեցնեմ, որ նման նախադեպային գործով Վազգեն Մանուկյանին տուգանք է սահմանվել 400 000 դրամի չափով, մեր պետությունը չի կարող լինել ուժեղ, եթե նրա հիմքում կասկած կա բարոյականության, արդարության և ազատության հանդեպ»,–ասաց նա։