Չինացին վաճառել է իր երիկամը՝ iPhone գնելու համար և հաշմանդամ դարձել

Չինացի Վան Շանկունի պատմությունը, որը դեռահաս տարիքում վաճառել էր իր երիկամը՝ iPhone 4 և iPad 2 գնելու համար, կրկին գրավել է հանրության ուշադրությունը: The Thaiger-ի հաղորդմամբ՝ նա դրանից հետո հաշմանդամ է դարձել։

2010 թվականին iPhone 4-ը չինացի դեռահասների շրջանում բավականին պոպուլյար էր։ Վանը այդ ժամանակ 17 տարեկան էր և չէր կարող գնել թանկարժեք սարքը, քանի որ իր ընտանիքը աղքատ էր։ Առանց ընտանիքին տեղյակ պահելու՝ Վանը դիմել էր օրգանների ապօրինի առևտրով զբաղվող գաղտնի ցանցի։

2011 թվականին Վանը անօրինական վիրահատության էր ենթարկվել՝ վաճառելով իր երիկամը 20,000 յուանով (2011 թվականի փոխարժեքով 3,135 դոլար), որն էլ նա օգտագործել էր ցանկալի սարքերը գնելու համար։ Տուն վերադառնալուց հետո Վանը խոստովանել էր մորը, որ վաճառել է իր օրգանը։ Վիրահատությունից կարճ ժամանակ անց նա ծանր վարակներ էր ձեռք բերել, և շտապ հոսպիտալացվել։

2012 թվականին Չինաստանի իշխանությունները ձերբակալեցին օրգանների առևտրով զբաղվողներին, և դատարանը կարգադրեց նրանց Վանի ընտանիքին վճարել ավելի քան 1.48 միլիոն յուան։ Սակայն Վանն այժմ ունի երիկամների մինչև 75% դիսֆունկցիա և տառապում է ջերմությունից ու թուլությունից։

Վանը խոստովանել է, որ երիտասարդ տարիքում կայացրած որոշումը իր կյանքի ամենամեծ սխալն է եղել, իսկ նրա մայրը դառնությամբ նշել է, որ գուցե ամեն ինչ ավելի լավ լիներ, եթե նա այն ժամանակ պարզապես հեռախոս գներ որդու համար։

Վանի պատմությունը կրկին արդիական է դարձել Ասիայում iPhone-ի ժողովրդականության ֆոնին, որտեղ գաջեթները շարուանկում են մնալ բարձր կարգավիճակի խորհրդանիշ։ Թերթը նշել է, որ թանկարժեք սմարթֆոնների միտումը ստիպում է երիտասարդներին ֆինանսական ռիսկերի դիմել՝ իրենց հասակակիցներին տպավորելու համար։