Թրամփը կարծում է, որ իսրայելցի պատանդները «շատ շուտով» ազատ կարձակվեն

ԱՄՆ նախագահ Դոնալդ Թրամփը հայտարարել է, որ իր կարծիքով Գազայում պահվող պատանդների ազատումը «շատ շուտով» կսկսվի, քանի որ միջնորդները նախատեսում են երկուշաբթի օրը հանդիպել Եգիպտոսում՝ պաղեստինյան ՀԱՄԱՍ խմբավորման և Իսրայելի միջև անուղղակի խաղաղ բանակցությունների համար, հաղորդում է BBC News-ը։

Բանակցությունները սկսվել են այն բանից հետո, երբ ՀԱՄԱՍ-ը համաձայնել է ԱՄՆ-ի 20 կետանոց խաղաղության ծրագրի որոշ մասերին, այդ թվում՝ պատանդների ազատմանը և Գազայի կառավարումը պաղեստինցի տեխնոկրատներին փոխանցելուն, սակայն ձգտում է բանակցել այլ հարցերի շուրջ։

Խմբավորման պատասխանում չեն հիշատակվել հիմնական պահանջները՝ զինաթափման և ապագա կառավարման գործընթացում ՀԱՄԱՍ-ի չմասնակցելու մասին։

Թրամփը, պատասխանելով ճկունության վերաբերյալ հարցին, ասել է. «Մեզ ճկունություն պետք չէ, որովհետև բոլորը հիմնականում համաձայն են դրան, բայց միշտ կլինեն որոշ փոփոխություններ»։

Նա հավելել է, որ իր տեղեկություններով բանակցությունները «շատ լավ են ընթանում»։ «Սա հիանալի գործարք է Իսրայելի համար, հիանալի գործարք է ամբողջ արաբական աշխարհի, մուսուլմանական աշխարհի և մնացած աշխարհի համար, ուստի մենք շատ ուրախ ենք դրա համար», — ասել է Թրամփը։

Միևնույն ժամանակ, Իսրայելի օդային հարվածները Գազայի ուղղությամբ շարունակվել են, չնայած Թրամփը ուրբաթ օրը կոչ էր արել Իսրայելին «անմիջապես դադարեցնել ռմբակոծությունները»՝ ՀԱՄԱՍ-ի արձագանքից հետո։

Իսրայելի կառավարության մամուլի խոսնակ Շոշ Բեդրոսյանը կիրակի օրը լրագրողներին հայտնել է, որ «չնայած Գազայի հատվածում որոշ ռմբակոծումներ փաստացի դադարել են, սակայն այս պահին հրադադար չի գործում»։

Բեդրոսյանը նշել է, որ վարչապետ Բենիամին Նեթանյահուն հրահանգել է «կրակ բացել պաշտպանական նպատակներով… եթե Գազայում մարտի դաշտում նրանց կյանքին սպառնալիք առաջանա»։

Գազայից ստացված հաղորդագրությունների համաձայն, Իսրայելը շարունակել է օդային հարվածներն ու տանկերից կրակահերթերը ողջ գիշեր և կիրակի օրը՝ ավերելով մի շարք բնակելի շենքեր Գազա քաղաքում։ BBC-ի թղթակիցը կիրակի առավոտյան, գտնվելով Իսրայելի Բեերի կիբուցի մոտ, լսել է պայթյուններ և տեսել ծխի սյուն։ Վերջին 24 ժամվա ընթացքում իսրայելական ռազմական գործողությունների հետևանքով զոհվել է ևս 65 մարդ։