Անդրադարձել են զբոսաշրջության բնագավառում համագործակցության հնարավորություններին

ՀՀ արտաքին գործերի նախարարի տեղակալ Մնացական Սաֆարյանի և Վիետնամի Սոցիալիստական Հանրապետության ԱԳ նախարարի տեղակալ Լե Թհի Թու Հանգի գլխավորությամբ Հանոյում կայացել են քաղաքական խորհրդակցություններ Հայաստանի և Վիետնամի արտաքին գործերի նախարարությունների միջև։

ՀՀ ԱԳ նախարարության «Ֆեյսբուք»-ի պաշտոնական էջում հրապարակված հաղորդագրության մեջ ասվում է, որ  կողմերը քննարկել են երկկողմ հարաբերությունների օրակարգի հարցերի լայն շրջանակ, այդ թվում՝ բարձրաստիճան փոխայցելությունների, միջազգային կազմակերպությունների շրջանակներում փոխադարձ աջակցության, ինչպես նաև առևտրի, տեխնոլոգիաների, նորարարության, կրթության և մշակույթի ոլորտներում համագործակցության ընդլայնման վերաբերյալ։ 

«Անդրադարձ է կատարվել Հարավային Կովկասի և Հարավարևելյան Ասիայի տարածաշրջանային վերջին զարգացումներին, այդ թվում՝ Հայաստանի և Ադրբեջանի միջև ձեռքբերված վաշինգտոնյան համաձայնություններին։ Ձեռք է բերվել պայմանավորվածություն փոխադարձ հետաքրքրություն ունեցող հարցերի, երկու երկրներում կայանալիք միջազգային ձևաչափի միջոցառումների առնչությամբ տեղեկատվության փոխանակման, ինչպես նաև բազմակողմ համագործակցության հարթակներում հետագա փոխաջակցության և իրավապայմանագրային դաշտի ամրապնդմանն ուղղված համատեղ աշխատանքների վերաբերյալ»,-ասվում է տեքստում։

Հանոյ այցի ընթացքում ԱԳ նախարարի տեղակալ Մնացական Սաֆարյանը հանդիպել է նաև Վիետնամի արդյունաբերության և առևտրի նախարարի տեղակալ, հայ-վիետնմական միջկառավարական հանձնաժողովի համանախագահ Ֆան Թհի Թանգի հետ։ Քննարկվել են միջկառավարական հանձնաժողովի երկրորդ նիստի անցկացմանն առնչվող հարցերը, երկու երկրների միջև առևտրաշրջանառության ընդլայնման ուղիները, ինչպես նաև գործարար շրջանակների միջև կապերի ակտիվացմանը վերաբերող նախաձեռնությունները։ Անդրադարձ է կատարվել զբոսաշրջության բնագավառում համագործակցության հնարավորություններին։