«Շփոթված եմ մի քիչ». Երևանում մեկնարկել է Եվրանեսթի 12-րդ լիագումար նստաշրջանը

Հոկտեմբերի 28-30-ը ՀՀ Ազգային ժողովում կանցկացվի Արևելյան գործընկերության խորհրդարանական վեհաժողովի (Եվրանեսթ) 12-րդ լիագումար նստաշրջանը, բյուրոյի և հանձնաժողովների նիստերը:

Այժմ ընթանում է Եվրանեսթի քաղաքական հարցերի, մարդու իրավունքների և ժողովրդավարության հարցերի հանձնաժողովի նիստը։

ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանը  հայտնեց, որ քվեարկելու են «Արևելյան գործընկերության և ԵՄ ընդլայնման քաղաքականության հեռանկարներին հանուն խաղաղության և կայունության տարաշրջանում» հաշվետվության նախնական տարբերակը։

ԱԺ «Հայաստան» խմբակցության պատգամավոր Արթուր Խաչատրյանը հետաքրքրվեց, ե՞րբ հնարավորություն կունենան խոսել առաջարկվող փոփոխությունների մասին։

Ա. Եղոյանն ասաց, որ հանդիպումից հետո կունենան հնարավորություն քննարկելու առաջարկվող փոփոխությունները։

Ժողովրդավարության աջակցության և ընտրությունների համակարգման խմբում Հայաստանի հարցերով առաջատար անդամ, Եվրոպական խորհրդարանի պատգամավոր, Թուրքիայի հարցերով մշտական զեկուցող Նաչո Սանչես Ամորը նշեց. «Շփոթված եմ մի քիչ, ստացվում է, որ հիմա չե՞նք քննարկելու առաջարկվող փոփոխությունները։ Ըստ իմ մոտ ունեցած սցենարի, հիմա պետք է քննարկվի։

Ա. Խաչատրյանը նշեց. «Քիչ շփոթեցուցիչ է, եթե ընդունենք զեկույցը, այնուհետև ինչո՞ւ և ինչպե՞ս պետք է քննարկենք առաջարկվող փոփոխությունները»։

Առաջարկվեց ընդհանրական ներկայացնել արդեն համաձայնեցված տեքստը, որից հետո  հնչեցին տարբեր կարծիքներ տեքստի մասին։