Զարգացումները դրական ուղղությամբ են ընթանում. Գևորգ Պապոյանը՝ ՏԱՑ-ի մասին

2026 թվականի պլանավորումը շատ լավ առիթ է նախորդ և առկա զարգացումների մասին խոսելու: Այս մասին Ազգային ժողովի տնտեսական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում՝ «ՀՀ 2026 թ. պետական բյուջեի մասին» օրենքի նախագծի նախնական քննարկումների ժամանակ, ասաց ՀՀ էկոնոմիկայի նախարար Գևորգ Պապոյանը:

Նրա խոսքով՝ 2024-ի տարեկան արդյունքներով գրանցվել է ՀՆԱ-ի 5,9 տոկոս իրական աճ, իսկ 2025-ի առաջին կիսամյակում 2024-ի նույն ժամանակահատվածի համեմատ ՀՆԱ-ի աճը կազմել է 5,6 տոկոս: 

«Զարգացումները դրական ուղղությամբ են գնում: 2025 թվականի հունվար-սեպտեմբերին նախորդ տարվա  նույն ժամանակահատվածի համեմատ գրանցված տնտեսական ակտիվության ցուցանիշը 7,6 տոկոս է, իսկ վերջին ամսվանը՝ 10,5 տոկոս: Դա վկայում է Կառավարության կողմից իրականացված տնտեսական քաղաքականությունների արդյունավետության մասին և մեզ որոշակի հիմք է տալիս պնդելու, որ այն նպատակադրումը, որ մենք ունեինք նախարարությունում, այն է՝ ունենալ շատ ավելի բարձր տնտեսական աճ, քան պետական բյուջեով էր սահմանված, պետք է իրականացնել: Եվ մենք կարծում ենք, որ տարեվերջին կամ հաջորդ տարեսկզբին, երբ մենք կամփոփենք արդյունքները, մեր կարծիքով, կունենանք շատ ավելի բարձր տնտեսական աճ, քան բյուջեով պլանավորել էինք»,- ասաց նախարարը: