«Զոհ աստվածներին». պատահական զբոսանքը Նորվեգիայում հանգեցրել է սենսացիոն գտածոյի

Նորվեգիայում զբոսանքի ժամանակ տեղի բնակիչը նկատել է հին ծառ, որը ժամանակին արմատախիլ էր արել փոթորիկը։ Հետաքրքրասիրությունը դրդել է տղամարդուն փայտով փորփրել արմատների տակ գտնվող հողը, և նա տեսել է ոսկու փայլատակումը։ Այդպես է հողի տակից երևացել շուրջ 1500 տարվա վաղեմության սրի պատյանի դետալը, գրել է Live Science-ը։

Հնագետները պարզել են, որ գտածոն վերաբերում է մեր թվարկության VI դարին՝ ժողովուրդների մեծ գաղթի դարաշրջանին։ Խոսքը պարզապես դեկորատիվ ծածկույթի մասին չէ, այլ սրի պատյանի շքեղ ոսկե տարրի, որը պատկանել է բացառապես բարձր կարգավիճակ ունեցող մարդու։ Ոսկե զարդի քաշը մոտ 33 գրամ է, երկարությունը՝ մոտ 6 սանտիմետր։

Մակերեսը ծածկված է կենդանական ոճի բարդ զարդանախշով․ խճճված պատկերները հիշեցնում են օձեր կամ ֆանտաստիկ արարածներ։ Նման առարկաները իշխանության, կարգավիճակ ունենալու և ռազմական էլիտային պատկանելու խորհրդանիշ էին։ Ամբողջ Հյուսիսային Եվրոպայում հայտնի է միայն մոտ 17 այդպիսի արտեֆակտ։

Հատկապես հետաքրքիր է, որ առարկան, հավանաբար, պատահաբար չի կորել։ Գիտնականները կարծում են, որ սուրը կամ դրա մի մասը կարող էին միտումնավոր «զոհաբերվել» աստվածներին։ Այդ մասին են մատնանշում խիստ մաշվածության հետքերը․ զենքը երկար ժամանակ օգտագործվել է, իսկ հետո գիտակցաբար հողի մեջ է դրվել։

Այդ ժամանակաշրջանում Սկանդինավիան ծանր ժամանակներ էր ապրում՝ կլիմայական աղետներ, հրաբխային ժայթքումներից հետո՝ սառը եղանակ և, հնարավոր է, համաճարակներ։ Հնագետները ենթադրում են, որ էլիտան նման ծեսեր էր կատարում՝ փորձելով ստանալ վերին ուժերի աջակցությունը։

Իրը գտնվել է Հովեից ոչ հեռու՝ Նորվեգիայի հարավ-արևմուտքում գտնվող իշխանության հնագույն կենտրոնի մոտ, որտեղ ավելի վաղ արդեն հայտնաբերվել էին հարուստ առարկաներ և էլիտար բնակավայրերի հետքեր։ Սա ամրապնդում է այն վարկածը, որ տարածաշրջանը II-VI դարերի միջև կարևոր քաղաքական և ծիսական կենտրոն է եղել։