«Տիգրանը պետք է դադարի McDonald’s ուտել». «Սլովանի» ղեկավարի հայտարարությունը Բարսեղյանի մասին

Հայաստանի հավաքականի կիսապաշտպան Տիգրան Բարսեղյանը շարունակում է մնալ Բրատիսլավայի «Սլովանի» կարևոր ֆուտբոլիստներից մեկը, սակայն Վլադիմիր Վայս ավագի հեռանալուց հետո նրա կարգավիճակը ակումբում կարող է փոխվել։ Թիմում նոր փուլ է սկսվում, և ղեկավարությունը հասկացնել է տվել, որ զիջումներ այլևս չեն լինելու։

«Սլովանի» գլխավոր տնօրեն Իվան Կմոտրիկ կրտսերը, մեկնաբանելով Բարսեղյանի հարցը, հայտարարել է, որ նոր գլխավոր մարզչի գալուց հետո բոլոր ֆուտբոլիստները սկսելու են մաքուր էջից և պետք է կրկին ապացուցեն իրենց տեղը հիմնական կազմում ունենալու իրավունքը։

«Ինչ վերաբերում է եզրերին, մենք դեռ հույսեր ենք կապում Տիգրանի հետ։ Բայց նոր մարզչի և նոր էներգիայի գալով՝ մեզ մոտ բոլորը սկսում են զրոյից։ Յուրաքանչյուրն ստիպված է լինելու պայքարել իր տեղի համար։ Այսպես ասեմ՝ Տիգրանը պետք է դադարի McDonald’s ուտել և սկսի ամբողջ ուժով մարզվել, որպեսզի տպավորի նոր մարզչին», — Կմոտրիկի խոսքերն է մեջբերել Na Tehelnom poli փոդքաստը։

Կմոտրիկի խոսքերով՝ McDonald’s-ի մասին արտահայտությունը մասամբ հնչել է կատակով, սակայն թեման ակումբի ներսում լավ հայտնի է։ Ավելի վաղ Վայս ավագը խոստովանել էր, որ Բարսեղյանն իսկապես սովորություն ուներ խաղերից առաջ այցելել McDonald’s, սակայն մարզիչը աչք էր փակում դրա վրա, քանի որ հայ ֆուտբոլիստը հաճախ արդյունք էր ապահովում թիմի համար։

«Նոր ռեժիմում այլևս տեղ չի լինի որևէ զիջման կամ հատուկ վերաբերմունքի համար։ Բոլորը գիտեն, որ սա քննարկվող թեմա էր։ Տիգրանի և մարզիչ Վայսի հարաբերությունները շատ մտերիմ էին, նույնիսկ՝ առանձնահատուկ», — նշել է Կմոտրիկը։

Միևնույն ժամանակ «Սլովանի» ղեկավարը շեշտել է, որ բարձր է գնահատում Բարսեղյանի ֆուտբոլային որակները, սակայն նրանից ավելի մեծ կայունություն է սպասում։ Նրա խոսքերով՝ հայ կիսապաշտպանը կարող է ֆանտաստիկ ֆուտբոլիստ լինել, երբ լիարժեք աշխատում է և կենտրոնացած է խաղի վրա։

2025/26 մրցաշրջանում հայ կիսապաշտպանը անցկացրել է 37 հանդիպում, խփել 11 գոլ և կատարել 6 գոլային փոխանցում։

Բարսեղյանի պայմանագիրը ակումբի հետ ուժի մեջ է մինչև 2027 թվականը, սակայն հավանական է, որ նա թիմը լքի արդեն այս ամռանը, իսկ «Սլովանը» կփորձի նրա տրանսֆերից որոշակի գումար ստանալ։